Gaza, Nailur:
Ka longïing jong u Abu Jarad, ka la hap ban phet krad na ka ïing sah jong ki, bad shah pynkynriah haduh 11 sien hapoh tang ki ar snem, na ka daw jong ka jingther bom jong ki shipai Israel ha Gaza. Mynta ki ïakynduh ïa ka jingkyrduh bam, khlem pisa ban thied jingbam bad khlem don ki jingïarap ban poi sha ki. Ka longïing kaba don 8 ngut, kynthup ïa 6 ngut ki khun kynthei bad kawei ka khun ksiew kaba dang 2 snem ka rta, kiba la ïakhun ha ka jingim da kaba shu sah ha ïingjaiñ khlem da ïoh ïa ki jingdonkam ba kongsan bad donkam eh.
Ki mad ruh ïa ka jing duna ha ka ban ïoh ïa ka um bam um dih, ha kaba ki khun kynthei ki hap ban ïaid palat shi kilomitar ban pdiang um na kawei ka trok kaba ïaid lyngba, kaba la duh noh shwa ba kin ïoh pyndap lut ïa ki khiew jong ki.
Ki don ruh hapdeng ka jingeh ha ka koit ka khiah, ka jaka kam long kaba shngain, ki don ki jaka shipai Israel kiba don hajan bad ki kali ïasiat thma (tank) kiba ïaid shapoh bad shabar.
Ka United Nations, ka la pynbna ba ka jingkyrduh bam, ka la saphriang ha baroh kawei ka Gaza strip, ha kaba ym duna ïa ka 34 ngut ki nong Palestine, ki la ïap na ka jingduna bam naduh u bnai Risaw 2023, kiba bun ki dei ki khynnah. Ka jinglong jingman ka long kaba shyrkhei, ha kaba 80% na ki nongshong shnong jong ka Gaza ki mad ïa ka jingbym biang ka bam kaba jur. Ka jingkhang dam jong ka Israel ka la khanglad lut ïa ki jingïarap ïa ki briew, kaba la pynjur ïa ka jingeh.
Kane ka jingïashem jong ka longiing u Abu Jarad ka long tang kawei ka nuksa na kiba bun ki longïing Palestine kiba ïaleh ban im ha Gaza. Ka jinglong jong ki ka pynpaw ïa ka jingdonkam kyrkieh ïa ka jingïarap jong ki briew bad ka jingpynbeit ïa ka jingïaleh.
