Shillong, Nailur 18
Ka Seng Samla Mawlai Pyllun ha ryngkat ka Seng Longkmie Mawlai Pyllun ki la pynlong ïa ka jingthang mombati kum ka dak ban pynpaw ïa ka jingsngewlem halor ka jingshah pynïap i Kong Niancy Riahtam, i heprit Erica Thabah bad i heprit Insaphira Lyngdoh Mawnai.
Ki Paidbah nongshong shnong ka Mawlai ki la mih paidbah ban ïashimbynta kum ka dak ban pynpaw ka jingsngewlem na ka bynta kine mynsiem ba la shah pyniap dusmon ha ki kti jong ki riew thrang snam.
U President ka Seng Samla Mawlai, u la ong ka long kaba sngewsih ba ki mynsiem ba lui-lui hapoh ka shong ka thaw ki shah dkhat jingim jubor ki hap ban duh la ka jingim, bad kane ka ktah ïa ka jingsngew ki ba bun balang.
U la ong, ka Shnong Mawlai kam dei ban shongsyier ha ki jingpyntieng pynsmiej jong ki kam sniew ki ba wan lynshop ïa ka imlang ka sahlang bad kum kine ki jingjia ki dei ban duh ban dam noh bad kum ki paidbah dei ban rat dyngkhong ïa ki jingsniew nangne shakhmat.
U la ong, ka imlang ka sahlang hapoh ka shnong Mawlai ka dei ban long kaba khlaiñ bad ba ka jingsniew kam dei ban long halor hynrei ba ka jingbha kan don ba kan shngaiñ ka shnong ka thaw.
Kawei ka long kmie haba jingkren ha kane ka jingïalang ka la ong ba, la synjor ka jingshaniah hapdeng para marjan ïing jansem bad ki longïing longsem, kam don shuh ka jingÏadei ka ba jan hapdeng ki kmie ki kpa bad ki khun.
“Ngi pynmyllen ïalade da ka Mobile, hooid, ka mobile kam dei ka ba sniew hynrei lada bakla ban pyndonkam ïa ka, ka hikai ïa ki jinghikai ba phylla ba khyllah ba ym sngewlah mutdur ba u khynnah 13 snem, um don shuh ka mynsiem kum u khynnah, hynrei namar ka jingmlien bad ka jingïoh mon ban pyndonkam ïa ka mobile, ka la long kawei na ki tynrai jong ki jingsniew” la pynpaw ka longkmie.
Shuh shuh ka la ong, “Kumno la shisnem mynta ka aiñ kam lah ban ai ka jingbishar kaba hok ïa ki arngut ki ba la shah dkhat jingim jubor ha ki riew thrang snam, hato ka shonghok mo ban shu khñiot ïa ki tang namar ba ki dei na ka longïing longsem kaba duk ba duna ka ïoh ka kot bad bym nang bym stad”.
Ka la dawa ïa ki bor ka aiñ ba kan ai noh ïa ka jingbishar kaba hok ïa ka longïing longsem i Kong Niancy Riahtam, i heprit Erica Thabah ki ba la khlad shisnem mynshuwa ha Mawïong bad kumjuh ruh ïa i heprit Insaphira ba dang shen.
