Shillong, Nailur 18
U Bah Balajied Jyrwa u nongaiktien ka All Khasi Meghalaya Tourist Taxi Association (AKMTTA) u la pyntip ba ka seng kan weng noh shwa ïa ka jingïakhih ba khlem buh por kaba la sdang naduh ka 16 tarik u Nailur 2025.
Kane ka rai ba la shim ka AKMTTA kadei hadien ka jingïakren ba la khot da ka Deputy Commissioner (DC) ka East Khasi Hills, ha kaba ka la pyntikna ba kan sa don ka jingïakynduh lang bad ka Sorkar Jylla bad yn sa don lang ruh u Myntri Rangbah ka Jylla u Conrad K Sangma ha ka 23 tarik u Nailur 2025.
Kane ka jingkhot kyrkieh ka DC ïa ka jingïakren kadei hadien ba la jia ka jingshah pynsangeh da ki nongñiah kali kamai tourist kiba na Jylla Assam ïa ki kali kamai tourist na Meghalaya bad wat ïa ki kali shimet ruh ban rung shapoh Assam ha Jorabat.
U Bah Balajied u la pyntip ba ha kane ka jingïakren yn sa don lang ruh na ka liang ki tnad treikam bapher- bapher ka Sorkar Jylla, kum ka tnad kam pohïing, ‘Tourism’ bad ka tnad ‘Transports’.
U la ong ruh ba ha kane ka jingïakren ka seng, ka la rah ïa shibun ki mat ban ïakren bad ka DC, ba kumno ban ïarap lang ïa ki kali kamai tourist kiba na ka Jylla.
Haba ïadei bad ka jingbat ka seng ïa ki kali kamai tourist kiba wan na ka jylla Assam, u Bah Balajied u la ïathuh ba ka seng kam shym la pynphai ïa ki kali na Jylla Assam haba ki ïakhih, hynrei don kiba pynsngewthuh bakla ka sa mih kane ka jingjia ïa kulmar.
“Kam shym don ka jingkhang ïa ki kali kamai tourist kiba na Assam ban wan shapoh ka jylla Meghalaya hynrei ka jingdawa ka long beit ban wanrah ïa ka rukom treikam kaba shai bad ban pynim ïa ki nongñiah kali kamai tourist kiba na ka Jylla” la ong u Bah Balajied.
