Shillong, Nailur 19
Ka University of Science and Technology Megha-laya (USTM), kaba u Myntri Rangbah ka Jylla Assam u Himanta Biswa Sarma ha u snem ba la dep, u la kynnoh ba ka la wanrah ka jingshlei um ha Guwahati lyngba kaei kaba u la khot “Flood Jihad,” la lap ba ka la tei be-aiñ ha ki jaka khlaw khlem da ïoh jingbit na ka Sorkar Pdeng, ong ka kaiphod jong ka kynhun ba la thung da ka Supreme Court.
Ka Central Empow-ered Committee (CEC) ka kynhun ki nongbishar ka Supreme Court, kaba ai jingmut ïa ka ïingbishar ba ha khliehduh halor ki kam khlaw bad ka mariang, ka ïathuh ba ka Skulbah USTM ha Ri-Bhoi District ka klun jaka ïa ka jaka khlaw kaba heh haduh 25 hectares, ha kaba ha ka jaka ba 13.62 hectares ka dang ïaid ka jingshna.
Ka la ai jingmut ban pyngngat da ka kuna kaba T.150.35 klur bad ka la hukum ba ïa ka jaka ba la shah klun dei ban pynkylla biang kum ka khlaw hapoh shisnem.
Ka kaiphod jong ka CEC ka la bynrap ba ka jingtei ïa ka P.A Sangma Memorial Medical College, ka la kynthup lang ha katei ka jingtei kaba la pynjulor kumba 7.64 hectare ïa ka khlaw. “Ka jingpynjot ïa ka khlaw ka long kaba la leh palat, bad ïa baroh ka sawdong sawkun ruh la pynjulor” la ong ka CEC, da kaba kdew ba kadei ka “jingpynjot kaba jur bad khlem da pyrkhat” ha katei ka jaka.
Ka kynhun ka la ong ba ym shym la ïoh jingbit satia katkum ka Forest Conservation Act, 1980, watla ka tnad mariang jong ka Sorkar Pdeng ka la pyntikna ha u snem 2017, ba ka jaka USTM ka dei kaba hap ha ka jaka khlaw.
Kumjuh ruh ka tnad khlaw ka jylla ha u snem 2021 ka la pynkheiñ ïa ka Meghalaya Forest Regulation, 1973, ha ka jaka jong ka Medical College.
Nalor ka USTM, ka CEC ka la kam ruh ba ka don ka jingtih maw, tih mawshun beaiñ ha Ri-Bhoi District, da kaba khot ban pynsangeh noh ïa ki haduh ban da bishar bniah biang.
Ïa kane ka kaiphod la ai ha kaba ïadei bad ka mukotduma halor ka jingpynjot ïa ka mariang ha Meghalaya bad ka jingktah jong ka sha shiliang pud ha ki bynta ka Assam, khamtam ïa ka Guwahati. Ki jinglap jong ka ki wanrah ïa ka jingbishar bniah kaba thymmai ïa ka USTM, kaba la kyntait ïa ki jingkynnoh jong u Sarma halor ka “Flood Jihad” ha u snem 2023.
