Shillong, Nailur 19
Ka Jaintia Students Union-Narpuh Circle ka la leit ban buh jingthoh ha u Deputy Commissioner (DC) East Jaintia Hills District ha ba ïadei bad ka jingma na ka jingsator ki jingkieng ha Sonapur (Sonapyrdi) bad Umpasu da kaba ban dawa pynlong jingjurip.
“Kine ki artylli ki jingkieng ki dei kiba don ha Sonapur (Sonapyrdi) jong ka Wah Lukha bad ha Umpasu. Kine ki jingkieng ki la sdang ban don ki bynta ba buh jingma ban ïaid ki kali ba ïoh ki pra ha kano-kano ka por namar ka jingïaid ki kali ba kit palat pud khlem da don ka jingmana na ki bor district” ong ka kyrwoh khubor ka JSU-Narpuh Circle lyngba u President u Bah F. Lamare.
Ka JSU ka la ong, ka jingkieng Wah Lukha ka la shah ïeh shrah sha ba palat khlem don kiba peit ban jurip da ki engineer kiba tbit na ka tnat treikam jong ka sorkar ban ïoh leh ïa kaba donkam ban ïada (Preventive Measures) na ka jingkhyllem (Collapse) ha kano kano ka por.
“Ka JSU-Narpuh Circle ka la buh ka jingkyrpad ha khmat u DC ka East Jaintia District, Khliehriat ban phah pynlong mardor da ka jingjurip ne jingpeitbniah (inspection) ïa kine artylli ki jingkieng khnang ban lait na kano-kano ka jingbuh jingma.” La ong ka ka JSU-Narpuh Circle ha ka kyrwoh.
Shuh shuh, ka JSU ka dawa ruh ban shna pynbha noh ïa kitei ki jingkieng khnang ban lait ka jingshah ktah ha ka leit ka wan ki paidbah, namar kine ki jingkieng khamtam ka jingkieng Wah Lukha, lada shuh ieh sah kumto kan sa poi ka por ba ka lah ban pra bad kan sa buh jingeh bad ktah ïa ka leit ka wan ki paidbah ha ka pang ka shitom bad ka leit ka wan ki khynnah skul bad kiwei pat ki kam ki jam.
Ha kane ka kyrwoh khubor, ka JSU ka ïathuh ba, u DC ka EJHD u la dep kular ban shimkhia ban leh ïa kaba donkam na ka bynta kine ki ar tylli ki jingkieng.
