Shillong, Nailur 19
U Symbud Myntri Rangbah ba khmih ïa ka tnat Pynroi Sor, Bah Sniawbhalang Dhar u la kular ba ka Sorkar Jylla ka angnud ban pyndep noh ha ka ban pynkynriah ïa baroh ki nongshong dukan madan na ka thaiñ Cantonment bad Laitumkhrah hapoh u Nohprah.
Haba kren sha ki nongthoh khubor, u Bah Sniawbha u la ong, kumba leh ha Khyndailad, ki nongshong dukan ha kine ki artylli ki jaka ruh kin sa shah pynkynriah noh ha ka wat kaba ar jong kane ka kam.
“Ngi dang pynkhreh ïa ki jingdonkam. Nga tharai ngi dei ban lah ha ka ban pyndep ïa ka jingpynkynriah ïa ki hapoh u Nohprah,” u la ong haba pyntip ba ka tnat bad ka Shillong Municipal Board (SMB) kala sdang ïa ka kam ban ithuh ïa ki jaka na ka bynta ban pynkynriah ïa ki nongshong dukan madan.
Ha ka 29 tarik Nailar, ka ïingbishar Meghalaya High Court kala bthah ïa ka SMB ban kan leit ‘survey’ bniah bha bad ban aiti ïa ka jingkheiñ ïa ka jingdon ki nongshong dukan madan kiba buh dukan ha Laitumkhrah bad ban pynthikna ba ym dei ban shah ïa ka jingmih tam ki nongshong dukan madan thymmai ba khaïi ha ka thaiñ.
Ka SMB kala aiti ïa ka kaiphod ba pynpaw ba ki don bun ngut ki nongshong dukan madan ha ka thaiñ ki bym don satia ïa ki licence shong dukan madan.
Ki don 122 ngut ki nongshong dukan madan ba buh dukan ha ka thaiñ Laitumkhrah khlem ka licence ïa kaba 22 ngut la shem ba ki don hok katkum ki kyndon jong ka scheme.
Katkum ka jingong ka SMB, haduh 48 ngut ki nongshong dukan madan ba mih tam, kila kam ba ki dei ki nongshong dukan madan.
