Guwahati, Nailur:
Ki bor pahara ha ka thaiñ Shatei-Mihngi ki la lah ban ïaleh pyrshah halor ar tylli ki kam khaïi drok kiba shyrkhei ha kane ka taïew, ha kaba ki la ïoh kurup ïa ki drok kiba shongdor haduh T.30 klur ha ki jingkhynra ba kyrpang ha Assam bad Mizoram.
Ha Karbi Anglong distrik jong ka jylla Assam, ki pulit ki la kem ïa arngut ki briew hadien ba ki la ïoh kurup ïa u Ganja uba shongdor kumba T. 8 klur na kawei ka trok ha ka sngi Ba-ar.
Da kaba treikam katkum ka jingtip, ki bor pahara ki la pynjur ïa ka jingkhynra ha Dillai kaba hap hapoh ka Bokajan sub-division bad ki la bat ïa katei ka kali. Na ka jingwad bniah la lap ïa ki 148 tylli ki song kiba don 147.25 kg u Ganja ba la buhrieh ha kawei ka bynta ba sha kyndong. Kine kiba shah kynnoh, kiba wan na Rajasthan bad Haryana, ki la shah kem, bad la mudui mukotduma, ong ki heh sorkar.
Ha ka jingkhynra bakyrpang ha khappud Indo-Myanmar, ki shipai Assam Rifles ki la ïoh ban kurup 2.46 kg u drok Heroin uba shong dor kumba 20 klur tyngka ha Champhai distrik jong ka Mizoram.
Da kaba leh katkum ki jingtip ba la ïoh na ki riew shemphang, ki shipai ki la pynlong ïa ka jingkhynra hajan ka wah Tiau ha ka thaiñ surok Melbuk ha ka sngi Ba-ar. Mar ïalap ïa kitei ki briew, arngut ki suba lehnoh ki la iehnoh ïa ka mar bad phet krad sha shiliang pud shapoh Myanmar.
Ïa ki mar ba la kurup bad ïa ka kali ba la pyndonkam ban kit la aiti noh na ka bynta ban pynlong ïa ka jingtohkit katkum ka aiñ, la ong ka kyrwoh khubor ba la phah da ka tnat shipai Assam Rifles.
