Shillong, Nailur 19
U nongthaw aiñ ka NPP na Kharkutta u Rupert Momin u la ong ba ki jaidbynriew ka Rilum Garo ki dawa ban pynjlan ïa ka lynti rel na Mendipathar sha kiwei ki bynta jong ka thaiñ kynthup ïa ka East Garo Hills bad South Garo Hills.
“Kane ka long namar lada ngi don ïa ka lynti rel, ha ka leit ka wan kan kham duna dor bad ngin ïoh shibun ki lad kamai khamtam ha kine ki juk mynta ba kyrduh ki lad ïoh kam ïoh jam,” la ong u Momin ha ki nongthoh khubor.
Katkum ka jingong jong u, ka lynti rel kan wanrah ïa ka jingmyntoi ha ka ïoh ka kot, kum ha kit ka bah ïa ki mar rep bad ki marpoh khyndew (minerals) bad kane ka long kaba ai jingmyntoi ïa ki nongrep bad ki nongkhaïi. Haba kylli shaphang ka jingwan tuid jong ki briew ba nabar, namar ka jaka ïeng rel jong ka Mendipathar, u Momin u la ong, “Ka jingbun briew ka la duna bha mynta. Mano ba wan bad mano ba leit, ngi lah ban ïohi shai ïa kata, kumta ngam ïohi ba kan don jingma halor kata”.
Hynrei u la ong ba ki jaka khappud, kum ka ïew Mendipathar, Dainadubi bad ki bynta ka West Garo Hills, ki don jingma bad ki lah ban shah ktah ha ka jingwan tuid ki briew ba nabar.
“Kine ki jaka khyndiat ki long kiba don jingma, hynrei kumba long haduh mynta ym pat don ka jingwantuid ki briew kiba nabar, hynrei ngi hap ban husiar bad peitngor bha” la ong u Momin.
U nongthaw aiñ u la kdew ruh ba ka jingshna surok bad jingkieng ba dang shen na Dhubri sha Phulbari ka la pynjur ïa ka jingsngewkhia halor ka jingkylla ka jingbun briew ha kine ki jaka.
U Momin u la ban jur ba donkam ban husiar, kum ka Phulbari bad Rajabala, kiba lah ban mad ïa ka jingkiew ha ka jingtrei jingktah hadien ba la dep ban tei ïa ka.
