Jowai, Nailur 19
Haduh 7 tylli ki masi ryngkat uwei u muid ki la kyllon ïap hadien ba ki la shah pom ha u pyrthat uba la tied jur ha ka shnong Mupliang, West Jaiñtia Hills District.
Kane ka jingjia shah pom pyrthat kine ki masi kala jia ha ka por kumba 3 shiteng eiei ha ka nohphai sngi jong ka 19 tarik Nailur katba ki dang bam phlang sha lum.
Ïa ki masi la dei trai da ka Kong Pawlina Rymbai katba u muid la dei trai da u Ma Longinius Dkhar bad antad ba ka jingduh nong na kane ka jingjia kam duna ïa ka T.2.50 lak, kata tang ïa ki masi katba ka jingduh nong ha u muid ka la kot T.1.20 lak.
Ha kane ka jingjia, u nongsharai masi uba la tip kyrteng u Lakhon Sna, u khun jong ka Kong Riti Sna u la mynsaw bad la pynkit ïa u sha Civil Hospital Ialong bad mynta u don hapdeng ka jingshah sumar.
