Taiwan, Nailur:
La iathuh ba U President jong ka US, U Donald Trump, ula kyntait ban mynjur ia ka jingiarap pisa kaba $400 million sha ka tnad shipai ka Taiwan, da kaba ong, ba u kham kwah ia ka Taiwan, ba kan thied hi ia ki tiar ialeh jong ka, ban ia kaba ioh jingiarap. Kane ka rai ka pyni ia ka jingkylla kaba khraw ha ka polisi jong ka US ha ka jingiadei bad ka Taiwan, kaba iakynduh ia ka jingma kaba man ka por jong ka jingwan hiar thma ka China.
Ka US ka la dang long ka nongkyrshan ba kongsan tam jong ka Taipei bad ka nongsam jingiarap shipai kaba heh tam watla ka la sangeh noh ban ithuh ia ka Taiwan ha ki snem 1970 da kaba kyrshan ia ka China.
Ha ka jingsynshar jong u President barim u Joe Biden, ka Washington ka la mynjur palat $2 billion na ka bynta ki jingiarap shipai na ka bynta ka Taiwan.
U Trump “um kyrshan ban phah tiar khlem da siew”, ka jinglong kaba la paw ruh ha ka rukom leh jong u ïa ka Ukraine.
Kane ka rai ka ïahap bad ka jingïakren khaii pateng hapdeng ka US bad ka China kaba dang ïaid shakhmat, ha kaba u Trump bad u President ka China u Xi Jinping ki la thmu ban ïakren halor ka jingsiew dor bad ka jingïateh kular kaba lah ban mih halor ka rynsan TikTok.
Ka jingpynslem ban mynjur ïa ki jingïarap ka buh jingeh shuh-shuh ïa ka Taiwan ban bei tyngka ïa la ka jong ka buit ïada bad ban pynneh ïa ka jingïadei kaba skhem bad ka Washington.
Lada ka jingsangeh kan long kaba neh, kan ai dak ïa ka jingpynkylla kaba khraw ha ka rukom pynïaid jong ka Washington ïa ka jingïadei jong ka Taiwan ha ka liang ka jingïada, ha kaba ka sorkar u Trump ka kham jied ïa ka Taiwan ban bei tyngka kham bun ha ka jingïada jong ka.
Ka Taiwan ka la nang pynjur ïa ki jingpyrshang ïada ri hapoh ka ri, ha kaba ka sorkar jong u President Lai Ching-te ka la pynbna ïa ka jingthmu ban pynbun ïa ka jingpynlut ha ki kam shipai ha ki drone bad ki jhad shipai duriaw. La kyntu ia ka Taipei ban pynbun ia la ka jong ka jingpynlut ha ka kam iada ri.
