Shillong, Nailur 19
Ka Sorkar India lyngba ka Ministry of Environment, Forest and Climate Change (MoEFCC), ha ka 08 Tarik u Nailur 2025, ka lah pynmih ïa ka jingpynbna ba yn nym donkam shuh ïa ka ban pynlong ïa ka “Jingsngap Paidbah” ne “Public Hearing” na ka bynta ban tih bad khlong ïa ki marpoh khyndew, kum u Urañium bad kiwei, da kaba aidaw ba kine ki marpoh kyndew ki long kiba donkam na ka bynta ka kam ïada-ri bad jingshngaiñ ka Ri India.
Ha ka kyrwoh ba la phah, ka Hynñiewtrep Youth Council (HYC) ka la ong, “ngim lah ban len ba ka Sorkar India mynta da ki phew tylli ki snem ka la pyrshang da ki buit ki bor kiba bunjait ban ïoh khlong ïa ki marpoh khyndew, khamtam ïa u Urañium na kane ka Ri kaba ieid eh ka jong ngi”.
“Hynrei namar ka jingsatar bad pyneh jong ki nongshong shnong kiba don ha ka thaiñ ba don u ne u marpoh khyndew ha ryngkat ka jingpyrshah jong ki dkhot jong ka Jaidbynriew hi baroh kawei, kane ka jingpyrshang jong ka Sorkar India kam shym lah urlong haduh kine ki sngi kiba mynta” la ong ka HYC.
Shuh shuh ka la ong ba ha kane ka khyllipmat kaba mynta, ka Sorkar India ka la thaw ïa ki buit sa ban pynkbum ïa ka shyntur ki nongpyrshah, ban knieh ïa ka hok laitluid ban kren bad rai halor ka khyndew ka shyiap bad kiba don hapoh jong ka, ka hok ban im khlem da shah ktah na ka jingma ba mih na ka jingtih ïa u ne u marpoh khyndew hapoh ka Ri Khasi.
“Hapdeng kane ka saw ka sian, ngi khot ngi wer ïa baroh ki dkhot jong ka Jaidbynriew ba ngin nym duh mynsiem lyngba kine ki buit sianti jong ka Sorkar lymne ban shoh tlot bad thait noh ban ïakhun ïa kane ka jingma kaba lah ban ktah ïa ngi kum ka Jaidbynriew hi baroh kawei. Hynrei, lada ka por bad ka ïa, ka dawa ïa ngi ban ïa mih madan, ban ïakhun dohïap, ban pyrshah horkit hordang ban khlong ïa u ne u marpoh khyndew na ka Ri kaba ieid ka jong ngi, ngi dei ban long kiba la kloi ban ïa mih shakhmat, ban ïa tylli kawei bad ïa khun khlem da pyndem na ka bynta ban ïada bad ban pynneh pynsah ïa la ka Ri bad ka Jaidbynriew” la ong ka HYC ha ka kyrwoh ba la phah.
