Nongstoiñ, Nailur 19
Ka kynhun ïalehkai jong ka Five Star ka la khur ïa ka nam lahduh ha ka lympung ïalehkai 2nd Knock-out Futsal Tournament 2025 ba la pynlong da ka Leonel Futsal Arena, Pyndengrei, hadien ba ka la pynliem noh ïa ka Orion da 4-1 kol ha ka sngi Palei.
Ha kane ka jingïakhun kaba la long ha madan Leonel Futsal Arena, u MLA ka Nongstoiñ u Bah Gabriel Wahlang u la long u kongsan ha ka jingdonlang ruh u Bah Lamkupar Sohlang, Divisional Soil & Water Conservation Officer Nongstoiñ Divi-sion ka West Khasi Hills kum u symbud kongsan, ki dkhot na ka Leonel Futsal Arena, ki riew rangbah bad kiwei-kiwei kiba la sam ruh ïa ki khusnam sha kitei ki kynhun da ka song pisa ryngkat ki trophy.
Lah ban kdew hangne ba ha kane ka lympung ïalehkai ki don haduh 32 tylli ki kynhun na kylleng ki jaka jong ka sor Nongstoiñ kiba la wan ban ïashim bynta.
