Shillong, Nailur 19
Ka United Hynniewtrep Movement ha ka 19 tarik Nailur 2025 ka la leit ban pynsngew ha ka Director General of Police ka Kong Idashisha Nongrang halor ka jingjur ki kam shah thombor ki khyllung khynnah, shah pynïap bad jingjyllei u drok ha ka Jylla bad dawa ban pyntreikam ïa ka aiñ.
U Bah Charlie Rani, President ka UHM, u la ong, ka jingleit ïakynduh, ïa ka DGP ka long halor ka nongrim ba ym don shuh ka jingshngaiñ ïa ki khyllung khynnah ha kine ki sngi bad ban pynsngew ruh ïa ka jingkiew ki jingjia shah pynïap ki khyllung khynnah ha kine ki khyndiat sngi bad kiba la jia kham mynshuwa ruh.
U Bah Rani u la ong ba ha kane ka jingleit kynduh ïa ka DGP, ki la kylli ïa ki jingjia kiba la dep jia, kum ka jingjia shah pynïap ha Mairang ïa kawei ka samla, ka jingjia shah pynïap ha Mawïong ïa i longkmie bad i heprit, ka jingjia ba jah briew ha Mawlai-Mawtawar bad kiwei-kiwei ki jingjia bad kyrpad ba ki dei ban pynïoh ïa ka jingbishar ba hok ïa ki bahaïing hasem jong ki lanot.
U la ong ba ka Ri Khasi ka dei ka ri tip-briew tip-Blei ba don ka jingshngaiñ hynrei ha kine ki sngi ba mynta ka jinglong jingman, ka la ima sha ba palat, namar ki jingjia shah pynïap bapher-bapher bad ka kam pynïap briew kam don jingeh shuh khyndiat ruh ha kine ki sngi.
Haba ïadei ïa ka jingpynshitom ïa kiba dih bad nongkhaïi drok, u la ong, “haba la ïohkem, dei ban pynkhlaiñ ïa ka aiñ, ba kim dei ban lait hapoh ka shisnem, namar lyngba ka jinglaitlan bad jinglait kloi noh jong ki, ka pynpoi ha u pud ba kiwei kim salia shuh bad ki ïoh mynsiem ban leh lang ïa kane ka kam”.
“Ngi tieng ba ki khun samla ki la bun bha kiba ngop ha une u jait jingdih pynbuaid, la dei ban pynkhlaiñ ïa ki bor pahara bad ka seng ruh ka kloi ban ai ka jingïatreilang lada donkam ha kano-kano ka por” u la ong.
U la ong ba halor kitei ki jingjia ba sngewtriem bad ba la pynshongsyier ïa ka imlang ka sahlang, ka seng ka dawa na ka DGP ban pynkhlaiñ ïa ki bor pahara bad ka Anti Narcotics Task Force (ANTF) ban tehlakam ïa kine ki kam sniew khnang ba kan long ka jingshngaiñ ïa ka imlang ka sahlang.
