Nongstoiñ, Nailur 19
Haduh 126 ngut ki samla kiba la wan shakhmat ha ki jingpule ki jong ki lyngba ki kyrdan bapher-bapher bad ki samla kiba don ïa ki sap ki phong ki la ïoh ïa ka khusnam bad ka jingpynkup burom na u MLA ka Nongstoiñ u Bah Gabriel Wahlang lyngba ka prokram ïa kaba la tip ruh kum ka 3rd MLA Excellence Award 2025.
Ki 126 ngut kiba la ïoh ïa ki khusnam ki dei na ka SSLC kynthup ïa ka samla Mesaribha Lyngdoh kaba poi ha ka 14th Position bad kaba la ïoh haduh 93.50% na ka Synod Higher Secondary School Shillong bad kaba shong ba sah ha ka shnong Ladweitang, u Samla Born Winner Marngar, 17th Position, 93.00%, na ka skul Anderson Higher Secondary School na ka shnong Mawïong Lumsyntiew, HSSLC, Bachelor’s Degree, Master’s Degree PHD, kumjuh ruh ki samla kiba don ïa ki sap ki phong bapher-bapher.
Ïa katei ka jingïalang la pynlong hapoh ka Hall jong ka skul Anderson Higher Secondary School Nongstoiñ ha ka sngi Thohdieng bad ha kane ka sngi ïa kitei ki samla kiba la wan kham shakhmat ha ki jingpule, u MLA u la ai ruh mar 20 hajar tyngka kaba long kum ka dak jong ka jingai mynsiem khnang ba kiwei ruh kin ïai minot bha ha ka pule kot, bad ïa kiwei pat la ai mar 6 hajar tyngka.
U Bah Gabriel Wahlang haba kren ha ka jingïalang u la ong, “baroh kiba ïoh ïa ka khusnam ka dei ka burom jong ka Nongstoiñ, naba phi la pynlong ïa ka Nongstoiñ ba kan nangkiew shakhmat’.
“Ngi don ka jingkyrmen na ka bynta ka lawei jong ka Nongstoiñ kaba phyrnai ka shong ha ki kti ki jong phi,” ong u Bah Gabriel.
Shuh-shuh u la ong, “Nga sngew ban ong ba U Blei u la thaw ïa nga bad ïa phi ha kane ka sla pyrthei bad u don la ka jong ka jingthmu ïa manla uwei pa uwei, ym don uwei ruh uba rit ne uba heh, ngi long kyrpang ha la i jong i jong bad kata ka jinglong kyrpang ka jong ngi, ngin shim bad buh hapoh dohnud ban kyntiew dalade ïalade ryngkat ki jingieit jong U Blei”.
Ha kane ka sngi, la don lang u Bah Garod LSN Dyke, Deputy Commissioner ka West Khasi Hills District, ka Kong Balarina Syiem District Sports Officer ka West Khasi Hills, Kong WA Sohklet, Principal ka Anderson Higher Secondary School bad ki kmie ki kpa lem bad kiwei-kiwei kiba la wan ban sakhi lang.
