Nongpoh, Nailur 19
U Myntri ba dei khmih ïa ka tnat Community and Rural Development (C&RD) ka Sorkar Jylla, u Bah Sosthenes Sohtun ha ka sngi Thohdieng u la plie paidbah ïa ka Umtyrnga Sub-Center ka ban shakri na ka bynta ki paidbah jong ki arphew tylli ki shnong kiba hap ha ki thaiñ khappud ka Ri Bhoi bad Assam.
Ha kane ka sngi la sakhi da ka jingïadon lang u Deputy Commissioner ka Ri Bhoi, u Abhilash Baranwal, ka District Health Surveillance Dr. AJ Syiemlieh, u Rangbah Shnong ka Umtyrnga Bah Migalan Marbaniang nalor kiwei de ki heh ophisar bad ‘riew pawkhmat ka thaiñ.
Ki arphew tylli ki shnong ki ban ïoh jingmyntoi lyngba kane ka jaka ai jingsumar kaba thymmai, ki kynthup naduh ka Umtyrnga, ka Iongkhuli, Chirba, Mawiong, Barapathar, Lalmati, Behenodi, Nagrabil, Umsen, Umlathu, Pahamjula, Jyrmang A bad B, ka Pyngker A, B bad C, ka Pilangku A bad B, ka Kamalbari A bad B lem bad ka Jorsyiem kiba dei ki shnong khappud.
Kane ka Sub-Center ka dei kaba la tei lyngba ka skhim Pradhan Mantri Ayushman Bharat Health Infrastructure Mission (PM-ABHIM) jong u snem 2021-22 ha ka jinglut kaba T.55.50 lak bad kaba la pyntrei da ka Village Health Council jong ka shnong Umtyrnga.
U Bah Sosthenes Sohtun haba ai jingkren ha kane ka sngi, u la pynpaw ïa ka jingkmen ban ïoh plie ïa kane ka jaka ai jingsumar kaba ki paidbah ha ki thaiñ khappud kila angnud la slem bha bad kan long ruh ka jingmyntoi shikatdei ïa ki arphew tylli ki shnong ka Ri-Bhoi kiba don ha khappud bad ka jylla Assam.
U la kyntu ruh ïa ki doktor bad nongtrei ha kane ka jaka ai jingsumar ba kin shimkhia bad trei bha ïa la ka kamram khnang ba kan nym mih kano kano ka jingkynthoh hadien habud. Kumjuh ïa ki paidbah ka thaiñ kiba leit ban shah sumar ha kane ka jaka, u Bah Sosthenes u la kyntu ba kin sumar khuid bad pyndonkam hok ïa ka khnang ba kan long ka jingmyntoi na ka bynta ka jong ki hi.
Nalor ka jingplie paidbah ïa kane ka jaka ai jingsumar, la sakhi ruh ha kane ka sngi ïa ka jingai jingsumar ei na bynta baroh ki jait jingpang sha ki paidbah nongshong shnong ka thaiñ ba la ai da ki nongtrei jong ka koit ka khiah ka district bad ruh na ka PA Sangma International Medical College.
