Jowai, Nailur 19
Ka Madur SC bad Maia Club Umjlasiaw ki la rung sha ka quarter final jong ka lympung ïalehkai 2nd Division Football Tournament ba la pynïaid da ka Thadlaskeiñ Sports Association (TSA) ha madan Multi Sports Complex, Wahiajer.
Kane kala wan hadien ba ka Madur SC bad Maia Club Umjlasiaw ki la khur jingjop haka pre quarter final kaba la long ha ka 19 tarik Nailur.
Haba phai sha ka jingïalehkai ka Madur SC kala jop ïa ka Lumkynsaw SC da 4-3 kol kaba la wan lyngba ka jingïashut tie breaker hadien ba ka jingïakhun kaba la buh por ka la kut da ka jingïakhaid kaba mar shi kol.
Na ka bynta ka Madur SC la thep da u Fernando Nongrum (OG) 14 katba ïa ka Lumkynsaw la thep da u Wellmanson Passah 28.
Ha ka jingïalehkai kaba bud, ka Maia Club Umjlasiaw ka la pynliem ïa ka Main Road SC da 1-0 kol lyngba ka kol ba la thep da u Leimiki Dkhar 53.
Ha ka 20/09/25 ka jingïalehkai pre quater final 2nd Division kan long hapdeng ka Nongdhar SC bad United Phlongingkhaw ha ka por 11.00 baje mynstep, ka Ryntih Mynsngat bad Bamkamar Wah ha ka por 1.00 baje nohphai sngi.
Katba ka jingïalehkai Super Division kan long hapdeng ka Nongkhroh Krem Kum bad Pohskur phlong ingkhaw.
