Shillong, Nailur 19
Ka kynhun ïakynjat bol jong ka Mawlai Presbyterian Higher Secondary School, Ïewrynghep ka la jop da 4-0 kol pyrshah ïa ka May Queen Secondary School, Mawlai Nongpdeng ha ka sngi plie pyrda ïa ka lympung ïakhun jong ka 10th Inter School Knock-Out Football Tournament 2025 ba la pynïaid da ka Federation of Khasi Jaintia and Garo People (FKJGP) Mawlai Circle ha madan heh mini stadium, Mawlai Phudmuri hynne ka sngi.
Ka Mawlai Presbyterian ka la thep ïa kine ki kol, 3 tylli ha ka kylla step bad shi kol ha ka kylla miet. Ïa kine ki kol na ka bynta ka Mawlai Presbyterian HSS la thep da u Arian Nongneng, Hameladapbiang Rani, Nangsanbah Syiemlieh bad Mewanpynkmen Khongmalai.
Ha kane ka lympung ïakhun ki la don baroh 14 tylli ki skul kiba ïashim bynta, kiba kynthup ïa ka Sunray HSS, Nonglum, ka Christ Church, Syllaikariah, St. Anne, Mawtawar, Bethesda, Sacred Heart Boys HSS, St. Alloysius, Umrynjah UP, Nongkwar UP, Christ Church B, OM Roy Memorial HSS, Jaiaw Presbyterian SS bad ka Nongkwar SS, nalor ka skul Mayqueen bad ka Mawlai Presbyterian.
Da kane ka jingjop ka Mawlai Presbyterian mynta ka la ïoh rung sha ka Quarterfinal jong kane ka lympung ïakhun.
Ha kane ka sngi la don lang u Luistar Lyngdoh, President FKJGP, North Khasi Hills District kum u kongsan ha ka jingdon ryngkat u Pynshai Kharbani, President ka West Khasi Hills District, kum u symbud kongsan, ki nongialam ka KSU Mawlai, ki nonghikai, ki khynnah skul bad kiwei-kiwei.
Ki paidbah ki la ïoh ruh ban sngap ïa ka jingrwai kaba sngewtynnat na ka samla Eibyntamiki Tang, kaba la rwai ha kane ka sngi hashwa ban sdang ka jingïakhun.
Haba ai jingkren na u kongsan u la pynpaw ba kine ki ar tylli ki kynhun ka Mawlai Presbyterian bad ka Mayqueen ki la long ba donbok bha ban ïoh ïalehkai ha ka sngi plie pyrda bad lehse kawei na kine ki kynhun kan long ka lahduh haba kut jong ka jingïakhun.
U khmih lynti ruh ba ha ki sngi ki snem kiba bud ba kin don ki khynnah na kine ki skul kiba ïashim bynta ba kin mih khmat ïa ka jylla ha ki jingïakob kiba heh jong ka ri India baroh kawei bad kumjuh ha ka international.
Ïa ka prokram ha kane ka sngi la pynïaid da u bah Khrawkupar Nongsiej, President ka FKJGP, Mawlai Circle bad la ïoh ruh ïa ka jingkren na u Varzellino Lyngdoh, general secretary ka FKJGP Mawlai Circle.
