Jowai, Nailur 19
Ki nongshong shnong ka Lapangap hapoh West Jaiñtia Hills District ki dang ïai bteng ban ïakynduh ïa ka jingeh haba ïadei bad ka rep ka riang namar ki nongshong shnong Karbi jong ka Tahpat hapoh West Karbi Anglong District ki la bteng biang ban pynthut ïa ki marsien ïohi ba ki la sdang ïa ka jingot kba lum ha ki lyngkha jong ki.
Ka jingot kba lum da ki nongshong shnong Lapangap ka la sdang ha ka 19 tarik Nailur, ha kaba kumba 50 ngut eiei ki briew ba dei ki jaidbynriew Karbi ki la siat da ki jri siat sim ïa ki nongshong shnong Lapangap kiba don kumba 30 ngut bad khambun na ki, dei ki longkmie katba ki dang ot kba lum.
Kitei ki nongshong shnong Lapangap ki la phet noh na katei ka jaka khnang ban lait na kano kano jingmynsaw bad ki la pyntip ruh sha ki bor pynïaid shnong halor katei ka jingjia.
Ki nongïalam shnong ha ryngkat ki pulit Meghalaya ki la leit hiar bran-bran sha katei ka jaka khnang ban ai jingïada ïa la ki nongshong shnong.
Haba ïakren bad u Waheh Shnong jong ka Dorbar Shnong Lapangap u Ma Deimonmi Lyngdoh, u la ïathuh ba ki Karbi ki la sdang ban pynthut ïa ki nongshong shnong namar ba la sdang ka por ot kba bad u pynpaw ruh ïa ka jingsheptieng ba kum kine ki jingjia ki nang ïai jia ha kine ki sngi ban wan.
U Waheh Shnong u la ïathuh ba mynta ki don tang 20 ngut ki pulit Meghalaya hapoh shnong bad kumta u la dawa ïa ka Sorkar ban phah shuh ki pulit sha Lapangap khnang ban ai jingïada ïa ki ha ka por ot kba.
