Mawkyrwat, Nailur 19
Ka KSU South West Khasi Hills District ha ka 19 tarik mynta u bnai ka la sei madan ïa ki jingshisha halor ka jingthmu ai jaka sha ki shipai da u Syiem Maharam ban shna ïa ka Unit Headquarter jong ki shipai ha Sohboitram (Photmula).
Katkum ki jubab RTI la lap, ba na ka liang u Syiem u la dep phah lypa ïa ka shithi sha ki bor Sorkar (Addl. Deputy Commissioner) ha ka 6 tarik u Jylliew, 2025 ban ong ba ma u lem bad ka Durbar Hima ki pdiang ïa kane ka jingtyrwa ki shipai wat lada ïa ka Executive Durbar Hima dang lum hadien 2 taïew hadien ba u la dep ai ïa kane ka shithi kata ha ka 28 tarik u Jylliew, 2025.
U samla Forwardman Nongrem, President KSU South West Khasi Hills District u la ong, kane ka jingleh jong u Syiem ka pyni ba u kheiñ dewthala ïa ka Executive Durbar Hima bad u shu shim ïa baroh ki Myntri Shnong bad ki Lyngdoh kum ki ñiangkohnguh ba un pynïaid katba mon ïa ki. Kane ka pyni ruh ïa ka jingleh donbor da kaba kynthoh ruh ba la ka Hima Maharam ka dei ka Hima synshar paidbah ne ka Hima synshar donbor shimet jong u Syiem.
Une u nongïalam ka KSU u la ong ruh ba ka seng lem bad ki khun hajar bad kiwei-kiwei ki sengbhalang ki sngew ban pyrshah jur ïa kane ka jingthmu namar ka seng ka tip shai ba ka Unit Headquarter ka dei ka jaka ba ki shipai ki mut pynlong shnong na bynta jong ki lem bad ki khun ki kti jong ki kumba long ha kiwei-kiwei ki jaka kum ha Upper Shillong, Happy Valley bad kiwei-kiwei.
Katkum ka RTI, u Samla Forwardman u la ïathuh ba ki shipai ki la leit ban jurip tang ïa ka Photmula hynrei kim kwah pat ban leit sha ki jaka ba hap ha ki jaka khappud (border line) ba ïajan bad ki jingker (fencing). Kane ka pyni ba ka don kaei-kaei sha lyndet halor kane ka bynta da kaba kdew ruh ba lada ki shipai kin ïoh thaw shnong ha ka Unit Headquarter, nalor ba kan ktah ha kiba bun rukom, kan pynlong ruh ïa ki paid Khasi ba kin nang rit paid shuh-shuh ha kito ki thaiñ nalor ba ki la rit paid lypa.
Haba ïadei bad ka thungkam thungjam, u la ong ba ka dei ka bym shongñia namar na kaei kaba la ïohi ka long ha ki jaka shipai ym shym la ïohi ba ki Khasi ne trai shnong kin ïoh wat ïa ka kam ban sar phyllaw.
Ka seng ka la pynshai ruh ba kan nang ïai pyrshah halor kane ka mat kat haduh ba u Syiem ryngkat ka Durbar Hima kin ai da ka jingthoh bad pynshai paidbah ba ki la weng noh ïa kane ka jingthmu.
