Shillong, Nailur 19
Ïa ka mukotduma ba ïadei bad jingpan jamin jong ka Sonam Raghu-vanshi la aiti noh sha ka ïingkashari ha Shillong (Court of Sessions) ban pynïaid shakhmat ïa ka kam hadien ba la sngap ïa ki arliang mamla bad la lap ba kane ka mukotduma ka long shabar ka bor jong ka ïingkashari ha Sohra.
Kane ka jingpynkynriah ka long hadien ba la pynbiang ïa ki kopi jong ka jingmudui bad kiwei ki kot ki sla sha u nongshah mudui katkum ka kyndon 230 jong ka Bharatiya Nagarik Suraksha Sanhita, 2023 (kaba ïasyriem bad ka kyndon 207 CrPC), bad ynda la bishar ïa ki arliang mamla, la paw ba ka mukotduma ka long shabar ka bor jong ka ïingkashari kaba ha Sohra.
Katkum kane, haba pyndonkam ïa ka bor hapoh ka kyndon 232 BNSS (kaba ïasyriem bad ka kyndon 209 CrPC), ïa ka mukotduma la aiti ha ka ïingkashari ba ha Shillong ban bishar katkum ka aiñ.
Ka Sonam, kaba la shah kynnoh ban pynïap ïa la u kurim, u Raja Raghuvanshi ha thaiñ Sohra ha u bnai Jymmang, mynta ka dang don ha ka jingshah set phatok. Ïa ka jingkylli halor ka jingpan jamin ka jong ka la ieh ban bishar bniah da ka Sessions Court, Shillong.
Ïa ka rikod jong ka mukotduma, ki kot ki sla, bad ki jingpyni ïa ki tiar dei ban pynpoi mardor sha ka ïingkashari ne ka Court of Sessions.
Ha kawei pat ka liang, la ong ba ïa ka ïing ka sem jong u Raja Raghuvanshi la mihkhmat da u Advocate Sujit Dey.
