Shillong, Nailur 21
U Symbud Myntri Rangbah ka Jylla ba khmih ïa ka tnad kam pynroi sor, u Bah Sniawbhalang Dhar u la pyntip ba kiba bun na ki projek jong ka ‘Smart City’ ki la jan dep bad la khmih lynti ba baroh ki projek yn pyndep ha kaba kut jong u snem 2026.
U Bah Dhar u la kdew ba ki don palat 150 tylli ki projek kiba dang ïaid shakhmat, ha kaba la kynjoh bad sakhi ruh ïa ka jingïaid shaid-shaid jong ki kam ki jam.
Haduh u bnai Naitung mynta u snem, ka jingpyndep ïa ki projek hapoh ka ‘Smart City’ ka long 77.81%.
Halor ka ‘Regional Committee’ kaba ïadei bad ka jingïa-ka-jia pud, u Bah Dhar u la pynpaw ba ki bynta jong ka komiti na ka bynta ka Ri-lum Jaiñtia bad Ri-Bhoi distrik kin neh kumjuh.
Hynrei na ka bynta ka West Khasi Hills, yn khmih biang da u Chairman namar ka jingkylla ha ka Kynhun Myntri.
Ka Sorkar Jylla ka dang ap ïa ka jubab na ka Sorkar na sha shiliang, kaba dang bunkam mynta ha ka ilekshon, u la bynrap.
Halor ka jingpynkynriah ïa kiba sah ha Them Ïew Mawlong, u Bah Dhar u la pyntikna ba ka Sorkar ka dang trei shitom halor kane ka mat bad ka thmu ban pynbeit noh kloi katba lah ïa kane ka kam.
