Shillong, Nailur 21
Ka NPP ka don ha ka bor bad ka don ruh 33 ngut ki MLA, hynrei kynmaw ka ilekshon kam wan tang shi snem, ka ilekshon ka wan shi sien san snem bad dei ban pynkhlaiñ ïa ka jingtreikam.
Ïa kane la kren da ka State President ka National People’s Party Women’s Front ka Kong Grace Mary Kharpuri ha ka jingïalang pynskhem ïa ka NPWF East Khasi Hills Disctrict bad ki nongkitkam jong ka.
Ïa ka Kong Damelari Ryntathiang na North Shillong la pynskhem kum ka President, ka Kong Bitalis Warjri kum ka Working President, ar ngut ki Vice President, ka Kong Evanylla Rynjah kum ka General Secretary, nangta la thung Sawngut ki Secretary bad ki dkhot.
Ka Kong Grace ka la ong, ka jingthaw ïa ka kynhun bad ka jingpynskhem ïa ki nongkitkam kam dei ban kut tang kumne, hynrei kum ki President bad ki nongïalam ba ha khmat kiba na ki Constituency bapher bapher ki dei ban leit sha ki Block ban ïakynduh ïa ki Unit, ban ïa treishitom lymda kumta ngin nym lah ban poi sha ka thong.
Ka la ai ka jingïaroh ïa ka jinglah ka Sorkar Jylla ban wanrah shibun ki kam pynroi da ka jingïalam u National President ka NPP u Conrad K Sangma kum u Myntri Rangbah ka Jylla bad ki Symbud Myntri ki ba la ïaleh ban treishitom ban wanrah ïa ka roi ka par, ka bha ka miat bad ka la dei ka pali ban ïatreilang baroh ban aiti met bad mynsiem ban trei.
“Ha ka Ri jong ngi bun ki longkmie ki ba im khlem u kpa, kane ka ktah bha ïa ka jingsngew jong nga bad ha kiba kum kine ruh ngi ki longkmie ngi don ki lad ki lynti ban peit ban ïarap ïa ki” ka la ong ka Kong Grace.
Ka la kyntu ruh ïa ki para longkmie ba kin long ka sur jong kiba bun balang, ban ïarap lem ïa ki para longkmie lyngba ki skhim ba ka sorkar ka ai.
Ka Kong Grace ka la ong, ka la ïakhun ïa ka ilekshon MLA bunsien bad kam man thait ban ïakhun dei namar ka pyrkhad ïa ki para longkmie,ym na ka bynta shimet.
