Shillong, Nailur 21
Ka North Eastern Hill University Teachers’ Association (NEHUTA) ka la dawa na ka tnad pule-puthi ka Sorkar Pdeng ban weng noh mardor ïa u Vice-Chancellor (VC) ka NEHU, u Prof. P.S. Shukla halor ki jingkynnoh bamsap pyrshah ïa u.
“Ka seng ka la lap ïa ki kam bamsap ba shyrkhei jong u Prof. P.S. Shukla (u bym don mynta ha ka skulbah), kaba ka seng ka la ju suba jur barabor. Hashuwa ka jingpyrshang ba rieh ban mang ïa ka projek kaba T.98 klur na ka tnad Minority Affairs, ka Sorkar India, ha NEHU-Campus, Tura sha ka Manipur Tribal Development Corporation (MTDC), Imphal, Manipur, u Prof. Shukla u la pyndonkam bakla ïa ka kyrdan treikam jong u na ka bynta ka jingmyntoi shimet da kaba ai jingmyntoi ïa ka MTDC ha ka bynta kaba sdang jong u snem 2024,” ong ki nongïalam ka NEHUTA ha ka kyrwoh khubor.
Haba kynnoh ïa ka jingpyndonkam bakla u Prof. Shukla ïa ka ophis treikam jong u, ki nongïalam ki la ong ba ha ka 6.03.2024, u Registrar ha kata ka por, u Omkar Singh u la ïasoi ïa ka MoU bad ka MTDC, hynrei ha ka 16.03.2024, u Director ka Tura Campus da kaba pynshong nongrim ïa ka MoU ba la soi, u la pynmih ïa ka ‘Work Order’ kaba shong dor T.82 lak sha ka MTDC na ka bynta ban siang surok ha kaba ka MTDC ka la ai ïa ki jingtip ba bniah halor ka jinglut-jingsep ha kajuh ka sngi.
Haba pynsngew ba ha katei hi ka sngi, la pynmih biang sa kawei ka jingthoh na ka Tura Campus sha ka MTDC, ka seng ka la ong ba ïa kane la leh watla ïa ka MoU bad ka MTDC ym pat shym la ïoh jingmynjur da ka Building Committee, ka Finance Committee, ne ka Executive Council jong ka NEHU.
“Ha ka 28.03.2024, ka MTDC ka la phah ïa ka jingkular ban pyndep ïa ka kam ba la aiti hapoh ka 31.03.2024. Ka phah ïa ki ‘Bill’ hapoh ka 30.03.2024 bad ha ka 30.03.2024, u Campus Director u la mynjur ïa ka ‘Sanction Order’ kaba T.82 lak sha ka MTDC kaba la mynjur da u Prof. Shukla ha ka ‘Note Sheet’ jong ka NEHU ha ka 30.03.2024,” ki la ong.
Ki la kdew ruh ba tang hadien 15 sngi ba la ai ïa ka kam, u Prof. Shukla u la mynjur ban pyllait ïa ka T.82 lak sha ka MTDC ban pyndep ïa ka kam, kumjuh ha ka 1.04.2024, ka MTDC ka la thoh sha ka Tura Campus ban ai por shuh ban pyndep ïa ka kam.
Na ka liang ka seng ka la buh jingkylli kumno u VC u la mynjur ïa ka jingai bynta ïa ka kam kaba shongdor T.82 lak sha ka MTDC halor ka nongrim jong ka MoU ka bym don ka jingmynjur jong ka aiñ.
“Katkum ki kyndon thung kam ïa u Campus Director, Tura, katei ka kam ka don ïa ka bor pisa kaba tang T.5 lak. Kumno pat u Campus Director u la pynmih ïa ka ‘Work Order’ kaba T.82 lak?,” la buh jingkylli ki nongïalam ka seng da kaba bynrap, “Hato ka MTDC ka la khot ‘tender’ ïa ka kam katkum ki kyndon? Lada ka long kumta, hato la buh ïa ka ha ka ‘website’, bad mynno la bishar bniah ïa ka? Hato lah ban pyndep ïa ka jingtrei baroh kawei ha ka por kaba lyngkot kum kane?”
Ka seng ka la buh jingkylli ruh ba kumno ïa ka jingsiew pisa kaba heh la mynjur kyrkieh da u VC tang hapoh 15 sngi naduh ba la ai ïa ka kam khlem da pyndep pat ïa kane kajuh bad balei la ïaid lait na ka Campus Development Department, NEHU, Shillong haba ïadei bad kane ka jingtreikam baroh kawei.
“Lah ban kdew ba hadien kane ka jingai sha ka MTDC, u Prof. Shukla nangta u la leit ban mynjur ïa ka jingai pisa ïa ka projek kaba T.98 klur sha kajuh ka kompeni khlem ka jingmynjur jong ka Finance Committee bad ka Executive Council kaba long kaba donkam. Kumjuh, ïa ka ‘tender’ ym shym la kot lyngba ka ‘eProcurement System’ jong ka India – ‘Central Public Procurement Portal’ (CPP Portal) kaba long kaba donkam, kaba pynkheiñ jur ïa baroh ki kyndon,” ong ki nongïalam ka NEHUTA.
“Haba ïadei bad ka kam kaba shongdor T.82 lak kaba kynthup ïa ka MTDC, ka jingleh u Prof. Shukla (omission and commission) ka long kaba paw shai. Ha kajuh ka rukom, ha kaba ïadei bad ka projek kaba T.98 klur, u la pyrshang ban ïaid lait ïa ka jingkhot ‘tender’ kaba kongsan ha ka ‘CPP Portal’ bad u la pyrshang ruh ban kyntait ïa ki ‘Statutory Body’ jong ka NEHU bad u la kwah ban ai kyrkieh ïa ka kam sha ka MTDC khlem da ïoh jingmynjur kaba biang, hynrei um shym la lah ban pynurlong,” ong ka seng.
Ka NEHUTA ka tikna ba un pyrshang ban leh thok biang ha ka liang jong ka MTDC ne kiwei-kiwei ki tnad lada ïoh lad, da kaba ïaid lait ïa ka ‘CPP Portal’ bad ban leh thok ïa baroh ki ‘Statutory Body’ jong ka NEHU, hynrei ka kyrmen skhem ba un ym jop ha ka jingthmu ba sniew jong u.
“Ka NEHUTA ka kwah ban pynsngew bad kyrpad ïa ka jingtuklar jong ka Droupadi Murmu, President ka India & Nongwan Jngoh, North-Eastern Hill University, Shillong bad u Dharmendra Pradhan, Myntri ka tnad Pule-Puthi ka Sorkar Pdeng, New Delhi halor kane ka kam bamsap bad ki jingbamsap jong u Prof. P. S. Shukla. Ka seng ka pynrem jur ïa kine ki kam bamsap jong u Prof. Shukla bad ka jingpyndonkam bakla ïa ka ophis treikam jong u kaba pynpaw ïa ka jingmyntoi kaba la ai na bynta ban ïoh kylliang eiei, hapdeng jong u bad ka MTDC,” ong ki nongïalam.
Shuh shuh ka NEHUTA ka shimkhia pura ban kyntiew ïa baroh ki Campus jong ka kynthup ïa ka Tura Campus hynrei ym ha ka rukom kaba bamsap ba la leh da u Prof. Shukla da kaba pynkheiñ ïa ki kyndon ka Sorkar India bad ban ïaid lait ïa ki kyndon aiñ jong ka NEHU khnang ban ïashah ïa kawei ka tnad treikam.
“Da kaba buh jingmut ïa ka jingkhraw jong ka kam bamsap, ka NEHUTA ka kwah ban kyntu ïa ka tnad treikam ka Sorkar Pdeng ban weng noh mardor ïa u Prof. P. S. Shukla,” pynkut ka kyrwoh na ka seng.
