Shillong, Nailur
U nongmihkhmat ka NPP na Kharkutta uba dei ruh u Chairman ka MNREDA, u Rupert Momin u la ïaroh ïa ka rai jong u Myntri Rangbah ka Jylla, u Conrad K. Sangma ban pynrung ïa u nongthaw aiñ ka Resubelpara, u Timothy D. Shira kum u Myntri bathymmai ha ka Kynhun Myntri jong u.
Haba kren sha ki lad pathai khubor ha ka Sngi Thohdieng, u Momin u la ong ba hadien 15 snem, khatduh-khatwai ka North Garo Hills ka la ïoh ïa u Myntri u ban peit ban khmih ïa ki jingdonkam jong ka.
U Momin u la pynpaw ïa ka jingdonkam ban pynbha ïa ki jingpynïasoh surok ha ka distrik.
Katkum ka jingong jong u, katba ki don ki surok kiba kham bha, kiwei pat ki donkam ïa ka jingshimkhia kaba mardor.
U la ong ba ka surok Mendipathar sha Songsak kaba la shna da ka jingstad ‘German’ ka donkam ïa ka jingmaramot ba mardor namar ka jingbun ki trok kiba ïadei bad ka steshon rel. Na Resubelpara shaduh surok Hospital 100 jingthiah ka dang donkam ban shna surok thymmai.
Halor ka surok Kharkutta sha Darangiri bad Mendipathar sha Krishnai, u Momin u la ong ba katto-katne ki bynta jong kine ki surok ki dang hap ban maramot, kaba ktah ïa ka jingkit ïa ki mar rep lajong kum ka kait, kwai bad synsar.
U la pyntip ba ïa ka surok na Adokgre shaduh Mangsang la dep ban shna, katba ka surok Mendipathar shaduh Songsak ka dang don ha ka jingpynkhreh bad la dep ban mang ïa ka.
U Momin u la pynpaw ka jingkyrmen ba da ka jingshimti u Timothy D. Shira kum u Myntri, yn sa lah ban weng noh ïa ki jingeh ha kaba ïadei bad ki jingpynïasoh surok ha ka distrik.
Shuh-shuh u la bynrap ba ka Sorkar ka dang trei ban pynïasoh ïa ki shnong ba kongsan da ki surok kiba bha hapoh kine ki ar snem ban wan.
