Jowai, Nailur 21
Hadien ka jingïakynad kaba la jia ha ka 19 tarik Nailur na ka jingwan thombor jong ki Karbi ïa ki nongrep kiba dei ki Pnar ha ka shnong Lapangap da kaba siat da ki jri siat sim, na ka liang u Symbud Myntri Rangbah ka Jylla, u Bah Sniawbhalang Dhar ha ka 20 tarik Nailur u la shimkhia halor ka jingïakynad kaba dang ïai bteng ha kine ki jaka khappud da kaba kular ban shim ïa ki sienjam ban pynthikna ïa ka jingshngaiñ jong ki nongshong shnong.
Haba kren sha ki lad pathai khubor, u Bah Sniawbhalang u la ong ba u la ïakynduh ïa ki heh ophisar bad ïa u Additional Deputy Commissioner (ADM) ka West Jaiñtia Hills ban ïoh shuh shuh ïa ki jingtip kiba bniah halor katei ka jingjia kaba la jia ha ka 19 tarik Nailur.
“Kane ka dei ka jingjia kaba sngewsih bad kaba sngewkhia shibun, bad ngin shim ïa baroh ki sienjam kiba kongsan ban pynthikna na ka bynta ka jingshngaiñ jong ki nongshong shnong ha ka por ba ki leit ban ot bad kheit ïa ki mar rep jong ki,” u la ong.
U la pynbna ruh ba ha ka 29 ne 30 tarik Nailur yn sa lum ïa ka jingïalang na ka bynta ban thaw ïa ka Peace Committee hapdeng ki nongmihkhmat na baroh arliang ban ïakren ïa pynbeit halor ki jingïakynad kiba dang ïai bteng ha kine ki jaka kiba don hapdeng ka jingïakajia pud.
U Symbud Myntri u la ong ruh ba la bthah ïa ki Rangbah Shnong ba kin ai ka jingïatreilang bad ki bor Sorkar, bad da lade hi un ïakren bad u Chief Secretary kumjuh bad ka Director General of Police ha kaba ïadei bad ka jingpynkhlaiñ ïa ka jingpahara.
Nalor kata u la ban jur ba ka thong ba hakhmat eh jong ka Sorkar ka long ban pynthikna ba ki nongrep kin lah ban bteng ïa ka jingleit ot kba khlem kano kano ka jingtieng jingsmiej bad ban khanglad ïa kiba kum kitei ki jingjia hadien habud.
