Shillong Nailur 21
Ki nongïalam shnong ka Shnongpdeng, Dawki ha West Jaiñtia Hills ha ka 20 tarik Nailur 2025 ki la pynpaw ïa ka jingeh ba ki ïakynduh ha kaba ïadei ka jinghiar ki nongwan jngohkai pyrthei, kaba la long ka jingeh bad pynhiar ïa ka kam jngohkai pyrthei ha ka thaiñ.
U General Secretary ka Dorbar Shnongpdeng u Bah Dapbor Syngkrem u la pynsngew ïa ki jingkynduh jingeh jong ki namar ka jingthud haba ïadei ka surok, kumjuh ka jingïakhih ki nongniah kali kamai Tourist ka Jylla, kane ka long ka jingeh kaba khraw ïa ki nongshongshnong jong ka thaiñ, lada ka sorkar kam lah banpynbeit ïa kine.
U la ong, ka thaiñ Dawki kum ka Shnongpdeng ka dei kawei na ki jaka jngohkai pyrthei ba la pawnam hadien jongka Sohra bad kaba la khring ruh bun bha ki nongwan jngohkai pyrthei, hynrei lyngba kine ki jingeh ka la ktah ïa ka jingwan ki nongwan jngohkai bad kum ki nongshong shnong ki ba im jakpoh na kane ka kam ki la shah ktah shibun, kaba la pynlong ba ki nongshong shnong kin diaw mynsiem namar ka jingthud bad ka jingduna ki nongwan jngohkai sha katei ka thaiñ.
U Bah Syngkrem u la ong ha kine ki khyndiat sngi ka seng ki nongñiah kali kamai tourist ha ka jylla ki pynlong ka jingiakhih ba ki dawa na ka sorkar ban pynurlong ïa ka mat jingdawa jongki.
U la ong ba, kum ka Dorbar Shnong kan ym pynrem ïano ïano, ha ka ri synshar paitbah, ki don la ka jong ka hok ban dawa, hynrei kaba kongsan ka long ba ka Sorkar ka dei ban shimkhia ïa ki mat kiba ktah ïa ka pliang ja ki nongshong shnong, namar haduh mynta ki ba bun ki longïing jong ka thaiñ Dawki, Darang bad kiwei ki shnong kiba im jakpoh na ka kam jngohkai bad ka jingwan ki nongjngohkai pyrthei.
“Ki nongshong shnong ha ki khyndiat snem ba la dep, ka kam jngohkai ki ithuh kum kawei na ki kam ba lah ban ai jingtngen ïa ki nongshong shnong ïa kiba la nang la stad ba kin ïoh kam, hynrei lada kine ki jingkynduh jingeh haba ïadei ka kam jngohkai pyrthei, ymlah ban pynbeit, kan long ka jingeh kaba khraw ïa ki nongshong shnong” la ong u Bah Syngkrem.
U Bah Syngkrem u la kyntu ïa ka sorkar ba kan shim ka jingkitkhlieh ïa ka jingdawa ba kongsan jong ki nongshong shnong, ka kam jngohkai pyrthei ka la paw bad ka la iaid shakhmat bad lada ka sorkar kam lah ban wanrah ïa ka jingïabeit ïaryntih, ka kam jngohkai ha ka Jylla jong ngi kan ym lah ban kiew.
