Shillong, Nailur 21
Ki kam thok kam shukor bad pynngop ïa ki riew paidbah ka dang ïai bteng na kawei ka sngi sha kawei pat bad ïa kane lah ban sakhi lyngba ki kam shah thok jong kiba bun lyngba ki kor social media.
Katkum ka khubor na ki pulit la ong ba uwei u nongshong shnong jong ka Shillong u la ai ka jingujor sha ki pulit ba haka 3 tarik mynta u bnai, u la ïoh pdiang kawei ka phone call kaba um ithuh, ha kaba u nong phone u la bthah ba un pynïasoh ïa ka call ne ka jingïakren bad ka CBI, ha kaba uwei u briew uba la kam ïa lade ba u dei u nongïasaid, u la shim interview ïa u bad ruh ban hukum ban bat noh ïa ki jingdon jingem jong u bad ha kaba u la shah thok pisa ei haduh T.4.7 lak.
Ha kawei pat ka khubor, ka khubor na ki pulit ka la ong ba na ka liang jong uwei u rangbah uba dei u nongshong shnong jong kawei ka dong ha East Khasi Hills u la ai ka jingujor ba ha ka 22 tarik Ïaïong, 2025, kawei ka briew ba la tip kyrteng kum ka Kong Rishbanta Kurbah, ka la tyrwa ïa u ïa ka kam sorkar bad kynnoh ruh ba ka la thok pisa ïa u T.8,300/-.
U Bah Joery Russel Kharlukhi, u trai jong ka M/s FJ Enterprise Lumdaitkhla, Bhoirymbong ha Ri-Bhoi u la ai ka jingujor pyrshah ïa uwei u ‘transporter operating’ hapoh ka ‘Narayan Roadlines’ na ka bynta ka jingthok pisa ïa u haduh T.1.05 lak.
Kawei ka longkmie kaba sah ha kawei ka shnong ha Tura (WGH) ka la ujor ba hadien ba ka la ïoh ïa ka ram kaba T.14,500/- ha ka 9 tarik mynta u bnai na kawei ka ‘Kreditbee App’, ka la ïohpdiang ki jingshah phone kiba pynjah burom bad kumjuh ruh ki text message, bad ha kaba na ka liang jong u nong phone u la dawa pisa na katei ka longkmie.
Ha kawei pat ka khubor u Sectional Assistant, PHE Ampati Section (SWGH) u la phah ka jingujor ba ha ka miet jong ka 15 tarik mynta u bnai, ki runar bym lah ban ithuh ki la tuh ïa ki cable kiba shongdor T.18,000/- na Borkona Water Supply Scheme.
Ha kawei pat ka jingjia, u Bah Samlang Robert Sohkhlet u la ujor ba ha ka 17 tarik mynta u bnai ha ka por 2 baje mynstep, ki runar bym lah ban ithuh ki la tuh haduh 9 tylli ki masi napoh ka sem kaba don ha ka shnong Phlang Dkhi (EKH).
U JE (WR), Phulbari Sub-Division u la phah ka jingujor ba ha ka miet jong ka 13 tarik mynta u bnai, ki runar bym lah ban ithuh ki la tuh 60 meter u radar cable napoh ka Chibinang Hydromel Station.
Ha ka miet ka 18 tarik mynta u bnai, uwei u briew uba kyrteng u Herush N Marak da ka ktien u la ïathuh ba ki runar bym lah ban ithuh ki la pyrshang ban pynjulor ïa ka dukan jong u kaba ha Rongbakgre, Tura (WGH).
