Kyiv, Nailur:
Ka Russia ka la siat da ki namding ba heh bad ki drone kiba thmu ïa ki thaiñ ha kylleng ka Ukraine ha ka step sngi Saitjaiñ (20 tarik u Nailur 2025), ha kaba la ïap ym duna ïa ka lai ngut ki briew bad pynmynsaw ïa ki phew ngut kiwei pat, ong ki heh sorkar jong ka Ukraine.
U President ka Ukraine, U Volodymyr Zelenskyy, u iathuh ba ki jinghiar thma, ki la jia ha kylleng ki hynniew tylli ki thain, kiba kynthup ia ka Dnipropetrovsk, Mykolaiv, Chernihiv, Zaporizhzhia, Poltava, Kyiv, Odesa, Sumy bad Kharkiv.
“Ka thong jong ki nongshun ka dei ïa ki jingtei jong ngi, ki jaka sah bad ki karkhana jong ki riew paidbah,” u la ong bad bynrap ba u namding ba la pyndap da ki tiar siat iasnohlang shibun la siat ïa kawei ka ïing ba bun mala ha ka nongbah Dnipro.
“Kawei pa kawei ka jingshah hiar thma kaba kum kane kam dei ka jingdonkam jong ki shipai hynrei ka dei ka buit kaba la thmu da ka Russia ban pyntieng ïa ki riew paidbah bad ban pynjot ïa ki jingtei jong ngi,” u la ong ha ka jingpynbna ha ka rynsan Telegram ba pura jong u.
U Zelenskyy u la ong ba u khmih lynti ban ïakynduh ïa u President jong ka U.S. Donald Trump ha ki bynta jong ka jingïalang bah jong ka United Nations ha ka taiew ban wan. U la ong ruh ba ki kynthei ba nyngkong eh jong ka Ukraine bad ka America kin pynlong ïa ki jingïakren ba kyrpang kiba pynleit jingmut ha ki kam ba ïadei bad ka jinglong briew kiba ïadei bad ki khynnah.
Ki don 26ngut ki briew kiba la mynsaw ha katei ka jingshah thombor ha ka thain Dnipropetrovsk kaba don ha pdeng jong ka Ukraine, ong u Serhii Lysak, uba dei u Lat jong katei ka jaka. Katto katne tylli ki iing bad ki iing kiba heh ki la shah pynjulor ha ka nongbah Dnipro kaba don shaphang mihngi.
Katba ha ka thaiñ Kyiv, ki bor synshar shnong ki la ong ba ki la don ki jingshah ther ruh ha ki jaka jong ka Bucha, Boryspil bad Obukhiv. Kawei ka iing bad ki kali ki la shah pynjulor. Ha ka thain sepngi jong ka Lviv, u Gov. Maxim Kozytsky, u iathuh ba ar tylli ki namdoing ba dang buh ki la shah siat pynjulor noh.
Ka Russia, ka la pynher 619 tylli ki drone bad ki namding, ong ka kyrwoh jong ki shipai suin jong ka Ukraine. Baroh ki don 579 tylli ki drone, 8 tylli ki Ballistic Missile bad 32 tylli ki Cruise Missile. Ki shipai jong ka Ukraine, ki la siat bad pynduh pyndam ia 552 tylli ki drone, ar tylli ki namding bad 29 tylli ki namding.
“Ha ka por ba hiar thma da ka liengsuiñ, ki liengsuiñ ba stad, khamtam eh ki liengsuiñ F-16, ki la treikam bha ha ki missile ba ïaid lyngba jong ki nongshun. Ki tiar iakhun jong ki ri Sepngi sa shisien ki pynshisha ïa ka jinglah treikam bha jong ki ha ka madan thma,” ong ka tnat shipai suiñ ha ka kyrwoh.
