Washington, Nailur:
U president jong ka U.S., U Donald Trump, u thmu ban wanrah ïa ka jingsiew ba thymmai kaba $100,000 na ka bynta ki visa nongtrei H-1B, katkum ka jingong jong u heh jong ka White House, ha ka jingpyrshang ban pynduna ïa ka jingpyndonkam ïa ki, kum shi bynta jong ka jingpynshitom beiñ kaba kham heh jong u ïa ki nongwan buhai shnong.
U president ka Republican la khmih lynti ba un soi ia ka jingpynbna naduh ka sngi Thohdieng kaba khanglad ia ka jingrung hapoh ka prokram H-1B visa lymda siew ia ka bai aplai, la ong u heh sorkar. U Trump u la thmu ruh ban hukum ban pynkylla ïa ki kyrdan jingsiew ba mynta na ka bynta ka prokram H-1B kum ka lad ban khanglad ïa ka jingpyndonkam ïa ki.
Ka prokram H-1B ka la long kaba kongsan bha na ka bynta ki kompeni teknoloji bad ki kompeni kiba shaniah ha ki nongtrei nabar ri ban pyndap ia ki kam bapher bapher kiba iadei bad ka ki kam teknoloji.
Ka Amazon ka don palat 10,000 tylli ki H-1B Visa ba la mynjur ha u snem 2025, katba ka Microsoft bad Meta Platforms ki don palat 5,000 tylli ki Visa H-1B kawei kawei, katkum ka ha ki kam shong shnong bad wan buhai shnong kujuh jong ka U.S.
Ka Bloomberg News kham mynshwa ka la iathuh ia ka jingthmu jong u Trump ban soi ia katei ka hukum ha kaba iadei bad ki jingpan visa H-1B.
Ki jingioh bynta jong ka Cognizant Technology Solutions Corp, kaba dei ka kompeni kaba ai jingshakri ia ka IT kaba shaniah bha ha ki briew kiba don ia ka visa H-1B, ki la hiar palat ia ka 5% ha ka sngi Thohdieng.
Ki nongkynthoh ia ki visa, kynthup ia kiba bun ki nongtrei teknoloji na America, ki kynthoh ba ki kompeni ki pyndonkam ia ki nongtrei visa H-1B ban pynduh ia ka jingsiew bad ban iaid lait ia ki nong America na ka bynta ki kam kiba ki lah ban ioh lym kumta.
Ka India ka dei ka ri kaba ioh jingmyntoi tam na ki visa H-1B ha u snem ba la dep, ha kaba ka don 71% na ki nongioh jingmyntoi ba la mynjur, katba ka China ka long kaba ar kaba jngai bha kaba long 11.7%, katkum ka jingkhein jong ka sorkar.
Ka prokram visa H-1B ka dei kaba la buh kyrpang na ka bynta ki briew kiba trei ha ki kam ba kyrpang, bunsien ha ka liang ka teknoloji. Ki lah ban kynthup ia ki nongshna software, ki nongpyniaid ia ki prokram tech bad kiwei kiwei ki nongtrei IT. Ia ki visa H-1B la mynjur na ka bynta lai haduh hynriew snem.
