Beijing, Nailur:
Ka tnad pynïaid ïa ka internet jong ka China, ka Cyberspace Administration of China (CAC), ka la shim ïa ki sienjam pynshitom pyrshah ïa ki ar tylli ki social media ba heh, kata ka Weibo bad ka Kuaishou, namar ka jingpynïaid bym biang ïa ki jingthoh. Ki platform ki shah kynnoh ba ki pynpaw ïa ki khubor jong ki riew pawkhmat bad ki jingthoh “bym kwah”, kaba la shim ba ka long ka jingpynkheiñ ïa ki kyndon ba pyrkhing jong ka China halor ki jingthoh online.
La kynnoh ba ka Weibo ka la “pynjulor ia ka platform online,” katba ka Kuaishou ka la shah kynnoh ba ka la noh synniang sha ka jingpynphriang palat ia ki jingthoh jong ki riew pawkhmat kiba la shim ba ki long kiba khlem jingmut.
Ka Weibo ka microblogging platform kaba don 591 million ki nongpyndonkam ba treikam man la u bnai, kaba ailad ia ki nongpyndonkam ban buh ia ki jingthoh bad ki dur, kiba pynleit jingmut nyngkong eh ha ki jingjia ba mynta.
Katba ka Kuaishou kadei ka app kaba buh ki durkhih lyngkot kaba ïasyriem bad ka TikTok, kaba don palat 730 million ki nong-pyndonkam man la u bnai.
Ka CAC ka la kynthoh ïa baroh ar tylli ki platform namar ba “kim lah ban pyndep ïa ka jingkitkhlieh ba kongsan jong ki” ha ka jingpynïaid ïa ki jingthoh, khamtam eh da kaba pynpaw ïa ki kyrdan na ka bynta ki jingwad ba pawnam bad ki jingthoh kiba pynpaw pyrthei palat ïa ki kam jong ki riew pawkhmat.
