Shillong, Nailur
Ka Hynniewtrep Youth Development Council (HYDC) ha ka 20 tarik Nailur 2025 ka la phah ïa ka kyrwoh sha u Secretary jong ka Ministry of Environment, Forest and Climate Change (MoEFCC) ban pynpaw ïa ka jingpyrshah jur ïa ka Office Memorandum (OM) jong kane ka ophis kaba la pynmih ïa ka jingpynbna ban weng noh ïa ka ‘Public Hearing’ ha ba ïadei ka jingtih ïa ki mar poh khyndew.
U Bah Bawan Nongsiej u Working President ka HYDC u la ong, Kane ka jingleh katei ka ophis ka dei ka jingleh donbor khlem da kwah shuh ban pynsngew ïa ka sur u paidbah ha kaba ïadei ka jingtih ïa ki mar poh khyndew ki ba la tip kum ki ‘critical element’ bad ‘radio active minerals’ ba kynthup ïa u Uranium.
U la ong kane ka jingleh katei ka ophis, ka seng kam lah satia ban pdiang bad halor kane ka seng ka ïeng rangbah ban pyrshah bad u la ong ruh ka ri India ka dei ka ri synshar paidbah, ym ka ri synshar donbor, ka seng ka buh ïa kane ka jingthoh ka long ban pyrshah jur khamtam haba la don bun ka jingpyrshang ban ïoh tih ïa u Uranium ha Meghalaya.
U Bah Nongsiej u la ong ka seng ka ïeng ban pyrshah ïa ka jingthmu jong ka Sorkar Pdeng ban tih ïa u Uranium ha Meghalaya bad ka jingtih ïa u Uranium ïoh lehse kan long pynban kum ka lynti ban plie ïa ka pandora box lane kum kata ka jingailad ïa ka nem sniew ba kan wan ban pynjot ïa ka jaidbynriew.
Shuh-shuh u la ong ruh, naduh ki por ba la leit ki seng bapher-bapher ki la pyrshah jur ïa ka jingtih ïa u Uranium bad ka HYDC kan ym shah da lei-lei ban tih ïa u Uranium bad kan pyrshah jur ïa kane ka OM na bynta ban weng noh ïa ka Public Hearing.
