Jowai, Nailur
Ka Kiang Nangbah Government College kaba dei ka jaka pule ba pawkhmat ka Rilum Jaiñtia ha ka 20 tarik Nailur ka la rakhe ïa lyngkhuh snem kaba 59 jong ka ha ka jingai jingshakri ïa ki samla pule ha ka liang ka jingnang jingstad.
Ha kane ka sngi la ïadon lang ruh u Symbud Myntri Rangbah ka Jylla u Bah Sniawbhalang Dhar kum u Kongsan.
Haba kren ha ka jingïalang u Kongsan u la ai ka jingïaroh ïa ka jingnoh synñiang ki Principal barim bad ki nonghikai ha ka ban kyntiew kyrdan ïa kane ka college ha ka liang ka pule puthi hapoh ka thaiñ da kaba kyntu ruh ïa ki samla pule ba kin don ïa ka jingkut jingmut kaba skhem ha ki jingpule ki jong ki.
U Symbud Myntri u la pynbna ruh ba la pynkhreh ïa ka Detailed Project Report (DPR) kaba T.25 klur na ka bynta ban tei thymmai bad pynitynnad ïa ka college. U la kular ruh ban ai 50 tylli ki laptop sha ki nonghikai hapoh jong u bnai Risaw 2025.
Nalor kata, u la plie ruh ïa ki jingtei pynitynnad kiba thymmai kynthup ruh ïa ka jaka pynïeng ïa ki kali ar shaka hapoh kane ka college.
Na ka liang ka Principal jong ka college ka Dr. LM Darnei ka la pyntip ba ka college kumba ka long mynta ka don 3,126 ngut ki samla pule na ki 15 tylli ki Department bad ka la ai ka jingïaroh ïa ka jingtrei shitom jong ki nonghikai bad ki nongtrei jong ka.
Ha kane ka sngi la pynkup burom ruh ïa ki samla pule kiba ïoh ïa ka kyrdan ba shakhmat jong ka NEHU kumjuh ïa ki nongtrei kiba la trei palat ïa ka 25 snem bad ïa ki samla pule barim kiba la ïoh ïa ka kyrdan PhD.
