Shillong, Nailur 21
U Lat ka Jylla CH Vijayashankar, ha ka sngi Saitjaiñ u la ïashim bynta ha ka jingïakynduh lang jong ki nongïalam niam na ki kynhun niam bapher bapher ba la pynlong da ka Central Puja Committee (CPC), Meghalaya, ha ryngkat ka jingïatreilang bad ka Ramakrishna Mission Shillong, kaba la long ha Ramakrishna Mission Puja Mandap Hall, Laitumkhrah.
Haba kren kum u Kongsan, u Lat u la pynkynmaw ïa u synñiang u bynhei ba ka CPC ka la noh sha u sup u thiar jong ka imlang ka sahlang, kynthup ïa ka jingai jingïarap ha ka por ba la jia ka jingwan lynshop ki bor mariang, ka jingsam dawai ei ïa ki longïing ba duna ka ïoh ka kot, bad ka jingkyrshan radbah haba ka jylla ka la shah lynshop ha ka khlam jingpang COVID-19.
U Lat u la ïaroh ruh ïa ka jingtreikam jong ka Central Puja Committee naduh ba la pynkha ha u snem 1992, ym tang kum ka shakri jong ki Puja Committee bad ki Mandir ha Meghalaya hynrei kum ka rynsan kaba kyntiew ïa ka imlang ka sahlang, ka jingsum bad ka jingïadei hapdeng ki jait niam bapher bapher.
Haba pynpaw halor ka mynsiem jong ka Durga Puja, u Lat u la ong, “Ka Durga Puja ka dei ka jingrakhe ïa ka jingjop jong ka jingbha halor ka jingsniew, ka jinglong babha halor ka jingthok, bad ka jingïatylli lang halor ka jingsngewrit ka dei ka kabu ban pynthymmai ïa la ki dohnud, ban pynkhlaiñ ïa ka jingïadei ha ka imlang ka sahlang, ban pynthymmai ïa ka jingsmai jong ngi ban im hapdeng ka jingsuk bad ka jingïalong shipara.”
Ha kajuh ka por, u Lat u la pynpaw ruh ïa ka jingsngewkhia halor ki jingeh kiba ka jylla Meghalaya ka la mad, khamtam halor ka jingjyllei jong u drok, ka jingpang Tuberculosis (TB), HIV/AIDS, ka jingpang bampong hapdeng ki samla bad ha ka imlang ka sahlang. U la kynthoh ïa kine kum ki dak ki shin kiba ma bad kiba shyrkhei, da kaba kyntu ïa ki kynhun jong ki niam bapher bapher, ki seng treimon sngewbha bad ki nongïalam shnong ban ïatreilang bad ka Sorkar ban pynphriang ïa ka jingtip, ban pynkhlaiñ ïa ki lad jingïada bad ban ai jingkyrshan ha ka por kaba biang ïa ki briew kiba shah ktah.
U la ban jur ba ki samla kiba dei ka lawei jong ka jylla, ki dei ban ïoh jingïada na kine ki jingeh bad ban pynkupbor ïa ki da ka jingnang jingstad, ki lad ki lynti, bad ki jinglong kiba bha ban long ki nongshong shnong kiba don ruh ïa ka jingkitkhlieh.
Ki nongïalam niam bapher bapher ki la ïashim bynta ha ka jingduwai lang ryngkat bad u Lat ka Jylla, kaba pyni ïa ka mynsiem jong ka jingïatylli, ka jingïalong shipara bad ka jingïasngewthuh jingmut.
Ha ka jingïalang la ïashim bynta lang da u Myntri ka Sorkar Jylla u Bah Sanbor Shullai, u Secretary jong ka Ramakrishna Mission Shillong u Swami Hitakamanandaji Maharaj, u President jong ka CPC, Meghalaya u Naba Bhattacharjee bad ki dkhot jong ki Puja Committee bapher bapher ka Shillong bad kiwei kiwei.
