Ka sien ba khatduh ba ka Meghalaya ka la ïoh ban sei da u Myntri Rangbah ba dei u Khasi ka la dei ha u snem 2009 ba la shimti ïa ka shuki Myntri Rangbah da u Dr Donkupar Roy (bam kwai ha dwar U Blei) da ka jingkyrshan jong ki 31 ngut ki MLA ha kato ka por. Hynrei kane ka Sorkar ba la tip kum ka Meghalaya Progressive Alliance ka la neh tang shi snem bad khyllem noh. Hadien kane, ïa ka shuki Myntri Rangbah la shimti pat da u Dr Mukul Sangma, uba la bteng ban bat haduh 9 snem bad ha u 2018 pat ïa kane ka shuki la shimti da u Conrad K Sangma jong ka NPP uba dang ïai bteng ban bat haduh mynta.
Kiei kita ki daw ba kum ka jaidbynriew Khasi Pnar kam lah ban sei ïa u nongïalam uba lah ban shimti ïa ka shuki Myntri Rangbah. Ym lah ban sngewthuh ba kaei kaba pynlong ïa ki para MLA, naba katkum ka histori jong ka jinglong jingman, la shem beit ba tang long Myntri Rangbah da u Khasi, baroh baroh ki ju ïakren beit sharum shaneng ba kane ka Sorkar kan nym neh slem bad ka ju jia ruh kumta, ha kaba la ju sakhi ïa ki jingkhyllem jong ki Sorkar khamtam lei tang lada don jingïakhih, tang katta ki paidbah ki la ap kmang ïa ka khubor ban don ka jingkylliang Sorkar. Hato dei ka jingïabishni, ne ka jingïakwah bor lang jong kiba bun. Kawei kaba ngi lah ban sngewthuh, ka long ba haba phai sha rilum Khasi Jaiñtia, ki bun palat ki nongïalam bad haba bun ki nongïalam, baroh ki kwah ban ïoh ban ïalam nakhmat. Ngi hap ban ai pat ka jingïaroh ïa ki paralok jong ngi na ki jaidbynriew Garo kiba sngewthuh ïa ka dor bad ka jingkordor jong ka kam. Ym ju kham ïoh sngew ban mih bun ki nongïalam hynrei haba ki jied, ki sei beit thik tang ïa uwei ne ar ngut, ïa kaba ngi la sakhi naduh ki snem 1972 ter-ter haduh mynta, ha kaba ki la sei ïa ki nongïalam kum jong u Captain Williamson A Sangma, u Purno A Sangma, Salseng C Marak, Dr Mukul Sangma bad u Conrad K Sangma.
Ha rilum Garo ym tang ba ki sei ïa uwei ne ar ngut ki nongïalam hynrei haba ki jied ïa ki seng saiñpyrthei ruh ki jied pynjop bun tang ïa kawei. Katba ha rilum Khasi Jaiñtia pat, ym tang ka jingbun palat ki nongïalam kiba mih, wat ki seng saiñpyrthei ruh ki mih bad don bun tylli. Ka jingdon jong kiba bun tylli ki seng saiñpyrthei bad bun ki nongïalam ka la pynshem jingeh ïa u paidbah nongjied ban lah ban sei ïa uwei u nongïalam. Lada mih ruh la sngewthuh ba un nym lah ban shan slem, namar kan don beit ka jingbym ïahun satia bad ruh ban ïatan na ka mon bad ka diang ban ïoh pynhap noh.
Ka Hynñiewtrep Integrated Territorial Organization ruh lyngba ki lad pathai khubor ka la pynsngew ïa kane ka phang bad ban kyntu ruh ïa u Myntri Rangbah ka Jylla u Conrad K Sangma ban aiti noh ïa ka shuki jong u, sha ki nongïalam na Khasi Jaiñtia ban ïoh ïalam lang ha kine ki snem kiba dang sah. Ka HITO ka la pyni ruh ïa ka nuksa ba ha u snem 1988, u Purno Agitok Sangma (bam kwai ha dwar U Blei) u la ïamynjur ban ïa kylliang ïa ka shuki Myntri Rangbah bad u Bah BB Lyngdoh (bam kwai ha dwar U Blei).
