Shillong, Nailur 22
Ka khubor kaba sngwsih ka la wan tap ïa ka Jylla hi baroh kawei ha kaba ka ‘thei apkol, ka samla Ibaihun Kurbah ka la khlad noh ha ka rta kaba dang 21 snem hadien ba ka jingshitom ka la ban ïa ka la katto katne bnai na ka daw ka jingshitom ha ki khyllai.
Ka Iba, ka dei ka nongïalehkai kaba don jingkyrmen ba kan nangkiew shaphrang bad ka la ïoh ban mihkhmat ïa ka Jylla kum ka nongapkol ha ka Sub-Junior Girls National Football Championship ha u snem 2019.
Ka la ïoh ïa ka nam Best Athlete ha ka U-18 girls ha ka State Level Chief Minister’s Inter School Athletics Meet ha u snem 2022 bad Best Athlete ha ka U-14 girls ha u snem 2017.
Ka Iba ka la ïoh ïa ka jingpan ha kaba sdang jong une u snem. Hadien ba ka la sdang ban mad ïa ka jingtlot bad ka jingpher ha ka met, ka la leit shah sumar bad na ka liang ki doktor ki la pyntip ba ka don jingshitom ha ki khyllai.
Dangshen ha u bnai ba la lah, na ka liang kiba haïing hasem jong ka, ki la buh ka jingkyrpad lada don kino-kino kiba lah ban noh synñiang khyllai na ka bynta jong ka. Ha kum katei ka por, ka Iba ka la hap ban mih man ka por na ïing jong ka, ha Mairang ban leit sha Shillong na ka bynta ban leh ïa ka ‘dialysis’ ne ka jingpynkhuid ïa ka snam.
Hynrei kane ka jingkhlad noh jong ka, ka la long ka jingduh kaba khraw namar ka long ka nongïalehkai kaba kynsai bad kaba dangdon jingkyrmen ba kan nanglah ban noh synñiang ïa ka Jylla lyngba ka kam ïalehkai jong ka.
Na ka liang ka Meghalaya Football Association (MFA) ka la pynpaw ka jingsngewsih halor kane ka jingkhlad noh ka samla Ibaihun Kurbah, ha ka rta kaba lyngkot.
“Ka Iba ym tang ba ka long ka ‘thei apkol kaba kynsai ha ka por ba ka la mihkhmat ïa ka Jylla ha ka Sub-Junior Girls National Football Championship 2019, hynrei ka la long ka nongïalehkai kaba don ïa ka mynsiem ïalehkai, ka jinglong discipline bad lyngba ka sap jong ka, ka la pynshlur bad ai mynsiem ïa baroh,” la pynpaw kat kum ka kyrwoh ba la pyllait da katei ka synjuk.
Na ka liang ka MFA ka ïeng ha ka jingïatylli bad ka ïing ka sem, ki paralok, bad ki para nongïalehkai jong ka, ha kum kane ka por jong ka jingsngewsih. To ai ba ka mynsiem jong ka kan shongthait ha ka jingsuk bymjukut.
