Shillong, Nailur 22
Ki pulit Anti Narcotic Task Force (ANTF) jong ka West Garo Hills District ki la ïoh ban bat noh ïa kawei ka kali Maruti Celerio bad na kane ka kali la ïoh ruh ban kurup ïa u drok heroin.
Ïa kane ka kali la ïoh ban bat ha ka sngi Saitjaiñ jong ka taïew ba la lah kata ka 20 tarik bad la ïoh bat ha ka por ba la pynlong ïa ka jingtalasi kali ha Kokaimari kaba hap hapoh ka thanad Phulbari.
Ha kane ka jingtalasi, ki Pulit ka ANTF kila ïoh kurup 5 tylli ki Synduk sabon kiba don ïa u drok ba la suba ba u dei u heroin uba don ka jingkhia haduh 53.67 gram.
La ïathuh ba kane ka kali, kaba wan na Guwahati bad kit 5 ngut ki briew kynthup ïa u nongñiah, u Noboruddin bad uwei u khynnah rit. Ha ka jingtohkit la lap ba ïa u drok la wan kit na Guwahati ISBT bad la thmu ban pynpoi sha uwei u briew ba kyrteng u Fazadur jong ka shnong Gomaijhora ha West Garo Hills District.
Ki Pulit kila kem ïa ar ngut ki briew kata u Sahidur Islam (32 snem) uba na Pushkinipara bad u Nazim Uddin Laskar (39 snem) na Narainpur, Silchar bad la kurup ïa ka kali nalor u drok bad kiwei-kiwei ki tiar katkum ki kyndon aiñ.
Ïa kine ki briew la register case ha thanad Phulbari (Case No. 40/2025) katkum ki kyndon jong ka aiñ NDPS. Ïa ki briew ba shah kem la phah sha ka ïingbishar ha ka 21 tarik u Nailur katkum ki kyndon jong ka aiñ NDPS.
U Superintendent of Police (SP) u Abraham T Sangma u la kyntu ïa ki paidbah ba kin long kiba husiar bad ban pyntip ïa kino-kino ki kam kiba suba kiba ïadei bad ka jingkhaïi drok sha thanat lane Police Control Room (PCR) Tura.
