Khliehriat, Nailur 22
Ka Saipung Block Sport Association (SBSA) ka la sdang ïa ka lympung ïalehkai 1st Division Football Tournament ha ka 20 tarik mynta u bnai ha kaba ka Jaraiñ SC bad Khaidong SC ki la khur ïa ki jingjop.
Ha ka jingïalehkai kaba nyngkong kaba la long ha madan Lamyrsiang, ka Jarain SC ka la pynliem noh ïa ka Sohïong SC da 1-0 kol bad ïa kane la thep da u Romario Dkhar ha ka minit kaba 31. Ha ka jingïalehkai kaba bud, ka Khaidong SC ka la jop da 3-1 kol ïa ka Thana Mulait SC.
Ha kane ka jingïakhun ka Khaidong ka la pynkhih jar nyngkong eh lyngba u Shalmon Nezar Sukhlain ha ka minit kaba 8, kumjuh u Providence Sukhlaiñ (34) bad u Ïaineh Sukhlaiñ (42), katba ka Thana Mulait ka la lah ban pynphai kylla shi kol ha ka kylla miet lyngba u Eban Dkhar (46).
