Raphael Warjri
Haba ka kmie ka shem ba u khun ne ka khun kim lah shuh ban lait na kane ka jingkyrni, ki sdang sa ban khroh ïa la ki khun ba kin antad da kaba kham pynduna, kaba mut ba ki ailad ban pynbiang hi da lade ïa la ki khun ba kin dih shuh shuh ïa u aphin. Ka la leit jia kumta namar ba kita kiba la hap ha ka lanot ki pynpaw la ka jinglong ba ki kwah ban lait hynrei ym don lynti pat ban lait namar ba la shah teh shah khum ha kata ka threw ka jrah aphin ba ym ju kut shuh. Teng teng ka poi shaduh u pud ba lada don ki briew ha ka imlang sahlang kiba kdew ïa kata ka kam thala, ki kmie ba ieit khun ki kyrda da kaba pynksan ïa la ka jingleh bakla lajong ban ai antad ïa u aphin ïa la ki khun kiba phla ba ym pat lah ban lait mar mar na kata ka jingsniew. Teng teng don ruh kiba dumok kylla ïa kiwei, tang ban ïoh pynkjeh khun. Ka jingma pat ka long ba kine kiba ngop ha u aphin ki lah ban leh ki kam bymman kam thala ba ym lah satia ban pdiang ha ka imlang sahlang.
Kita ki kam bymman kam thala ki lah ban long ba ym shynraiñ shuh wat ban shoh ban dat ïa ki kmie ki kpa, hynmen para lane ïano ïano kiba long diengpyng-kiang ha kata ka jingthrew jingrhah aphin. Kito ki briew kiba la ngop ha u aphin ki shong syier ïa lade ha kata ka jingsngew ban kyndiah syndon na uta u aphin, hynrei kata ka jingsngew tngen ka met ka phad, ka jingmut jingpyrkhat ka pynlong ïa ki ban kin kwah wat haba ki sngewthuh ba ym dei kaba bit ba biang. Ynda la ïoh jingbang jingtngen na u aphin ki klet lut phar ïa ka pyrthei, bad ki sa kyndit bynriew ynda haba la tlot bor noh uta u aphin ha ka met. Wat la kyndit bynriew, ka jingjrah jingthrew pat kaba la palat liam ba ym lah shah khlem da ïoh tang khyn-diat ruh, bad kata ka rukom ka ïai bteng khlem pud. Kumta kaba bha tam eh ka dei ban ym pyrshang da lei lei ruh. Horkit hordang ym dei ban don ha ka imlang sahlang da kano kano ka jingsngew stad jong kita kiba kam riewstad ïa lade ha kane ka liang.
Ka pali ka ba ap hakhmat mynta ka kynti ka dei ban long da kaba palei ban ïakhun ïa une u jynthaw kynshia bad dei ban sdang noh kloi lan namar ba la pur stet haduh katta katta ba lada syntan, yn sa shitom shuh shuh ban kyrda na une u jynthaw ba kynshia. Ka ba nyngkong ka long ban thwet jubor ïa ka tyllong ba mih une u aphin bad ban khang kdong haduh ban ym lah shuh ban saphriang. Kata ka long ka kam ba radbah ba dei ban synrop lang ki bor sorkar, ki shlem pule, ki sengbhalang, ki dorbar shnong bad baroh ki seng ne synjuk ba trei na ka bynta ka bha ka miat jong ka imlang sahlang. Lah ban sdang bun syrtap ki jingpyrshang ban ïakhun ym tang ka ban long pyrshah thik tang ïa u aphin, hynrei ïa kiwei kiwei ki bynta ha ka imlang sahlang kaba dei ban tei ïa ka bha ka miat. Kita ki syrtap ki long ba la dei ban kynpham naduh ki khynnah rit ha la ïing la sem ne ha ki skul, nangta ban sneng ban kraw ïa ki ba la kham san kum ki samla, ka husiar bad phikir na kiba la san la rangbah bad kaba kongsan tam ka long ban ïa syllok markylliang kita baroh da kaba kynjai. Kiei kiei kiba mih na kaba ki khun samla ki kyrni ha ka dih aphin ki long ki ba shyrkhei, kumta lada bakla ban aireng da ka kam ka ba jubor kan nang pluh shuh shuh pynban.
Kawei ka jingshisha kaba ym lah ban len ka long ba une u aphin kynshia u dei uba wan lam na shabar jylla, ym dei uba mih na kano-ma-kano ka tyllong kaba dei na la jylla lajong. Kumta ka iktiar synshar ka dei ban pyrman ïa ka tyllong ba wan ïaid lyngba bad wanrah tuh sha jylla. Katkum ba lah ban tih sani ïa ka lynti ïaid ka ba lah ban long ba wan hiar tuh une u aphin ka dei hi lyngba ka jylla Assam ba marjan kum lyngba ka Khanapara bad na Ratacherra.Ym pat lap ksai ba yn dei na khappud Bangladesh, hynrei jar la katta dei hi ban husiar ban kiar lypa na kano kano ka jingsniew ha ka imlang sahlang.
