Shillong, Nailur 22
U Bah Samborlang Diengdoh u la ong ba ka khajna ba ki paidbah ka Jylla ki pynlang lyngba ka petrol, diesel bad ka kyiad ka dei ban rung beit thik ha ka pla ïarong jong ka Sorkar.
ïa kane u Bah Sambor-lang Diengdoh u la pynpaw ha ka 22 tarik Nailur 2025 ha ka jingïakren bad ki nongthoh khubor, u la ong, ka Cabinet ka la ai jingmynjur ïa ka ‘Excise Amendment Rule 2025’ ha ka 12 Nailur 2025 bad Lyngba kane ka Amendment la bna wer-wer ba ka don pat kawei ka ‘Agency’ kaba ban wan ban pynïaid ha ka jingïadie ïathied ïa ka kyiad IMFL.
U la ong, la lah ban sngewthuh ba katto katne ka khajna ba ki paidbah ki siew ïa ka Sorkar kan rung sha ka ‘Agency’ ka ban pynïaid ïa ka jingïadie ïathied. U la ong, “La kata ka bhah ban siew ïa kane ka Agency, yn khate na ka khajna ba ki la siew da ki paidbah sha ka Sorkar ne ha kano ka rukom?”.
U la ong, na ka HSD (Diesel) ka khajna ka dei 5%, na ka MS (Petrol) ka khajna ka dei 13.5% bad na ka IFML (kyiad) ka khajna ka dei 30% , kine ki jingsiew khajna ki dei beit thik tang ban pynheh ïa ka pla jong ka Sorkar, ba kan lah ban siew tulop ïa ki nongtrei sorkar, ki nonghikai skul ne ki kolej bad u la ong “ïa kaba ki paidbah ka Jylla ki pynlang ka Sorkar kam dei ban pyndonkam bakla.”
“Kumba ki briew kiba don ha ka bor ki ju ong ba ki khun samla kim dei ban shu ap tang ban ïoh kam Sorkar, katba mynta haba ki samla ki la pynlut ha ki kam khaïi, lada pynmih pat kum kine ki kyndon, ka long kumba pynduh jingkyrmen ïa ngi” la ong u Bah Samborlang.
U Bah Samborlang u la ong, kane ka jingwanrah ïa ka Agency ban ïohnong percentage na ka khajna ka kyiad, kan sa ktah ïa ki briew ki ba don ha kane ka kam, namar ki briew ki ba don ha kane ka kam ki ïohnong tang 20% bad na kane ki hap ban pyndap ïa ki ba bun ki jingdonkam.
U Bah Samborlang u la pyntip ruh ba u la pan jingtip RTI na ka ophis treikam u Commissioner of Excise ban ïoh jingshai ba, la ka jingpynkylla ïa kane ka rule kan don jingkylla ne em ïa ka dor ki kyiad IMFL bad ban tip ïa ka Agency ka ban pyntreikam ïa ka ‘bar code’, halor ka jingkhot tender bad hashuwa ba ka sorkar kan shim ïa kane ka rai , ka la don ne em ka jingkhot ïakren ban ïa mir jingmut bad ki briew ki ba don bynta bad kane ka kam bad katno ki Agency kin shim haba pyntreikam ïa ki bar code system?
