Shillong, Nailur 22
U Myntri ka tnad Pule Puthi ka Sorkar Jylla u Bah Lahkmen Rymbui u la ong ba ka Sorkar kan dang hap ban bishar shwa ïa ka jingdawa ki nonghikai skul Adhoc.
U Bah Rymbui u la kdew ruh ba ka Sorkar Jylla mynta ka don hapdeng ka jingduna pisa ban pynurlong ïa kane ka mat jingdawa jong ki nonghikai Adhoc.
Kane ka jingkren u Bah Rymbui kadei hadien ba ki nonghikai adhoc kiba hap hapoh ka shatri Federation of All School Teachers Of Meghalaya (FASTOM) ha ka 22 tarik 2025, ki la sdang ïa ka jingïakhih shongkyllaiñ mungor khlem pud sngi ha Madan Malki, Shillong, ban dawa na ka Sorkar ban kyntiew kyrdan noh ïa ki skul bad nonghikai Adhoc sha ka Deficit System.
Haba ïakren bad ki lad pathai khubor u Bah Lahkmen u la ong ba ka tnad kan dang hap ban bishar bniah shwa halor ka jingïakhih jong ki nonghikai skul Adhoc.
Nalor kata, u la ong ba u dang shu shimti kum u Myntri ka tnad Pule Puthi ka Sorkar bad um da pat tip thikna ïa ka jingdawa jong ki nonghikai.
“Ngam pat lah ban ong eiei mynta halor kane jingdawa jong ki nonghikai bad kam long kaba suk ïa ka Sorkar ne ïa ka tnad ban pynurlong noh ïa kaei kaba ki dawa hynrei namar ngi don hangne ban ai ka jingshakri sha ki paidbah ngin pyrshang ban leh ban weng ïa kane ka jingeh ki nonghikai skul Adhoc” la ong u Bah Lahkmen Rymbui.
U Bah Lahkmen u la ong ruh ba na ka liang u Commissioner Secretary ka tnad Pule Puthi ka Sorkar Jylla, u la dep ruh ban ïakynduh ïa kine ki Association, kumta u la ong, kin sa peit kaei kaba ki lah ban leh. Da kaba bynrap ba kumba long mynta hi, na ka liang jong u un dang hap ban bishar bniah bha shwa, hashuwa ban shim ïa ka rai.
Shuh-shuh u la ong ba kane ka jingdawa ban kyntiew rah ïa ki nonghikai skul Adhoc sha ka ‘deficit system’ kam dei ka mat kaba dang mynta hynrei ka dei ka mat kaba la sahkut la slem bad ka dei ruh ka mat kaba shem jingeh bha ïa ka Sorkar ban pynurlong namar ka don ka jinglut kaba bun.
U la ïathuh ba ha u snem 2021, ka Sorkar Jylla ka la dep ban pynkiew ïa ka tulop jong ki nonghikai Adhoc. “Ka Sorkar kan dang donkam ban bishar biang ïa kane ka mat bad kan sa peit kaei kaba ki donkam ban leh halor kane” la bynrap u Bah Rymbui.
