Guwahati, Nailur:
Ka Barpeta distrik ka la kdew ïa ka mawjam ha ka jingai jingsumar kaba la dep ban pynlong ka Mega Health Camp kaba nyngkong eh kaba ïadei bad ka LAC hapoh ka Barpeta LAC ha kaba kane ka la long kaba jop.
Kane ka camp kaba shisngi, kaba la pynlong ha ka skul bah Bhella ha ka taïew ba la lah, ka la khring palat 3,200 ngut ki nongpang bad la ïaroh ïa ka kum ka dak ha ka jingsumar paidbah na ka bynta ka distrik.
La pynlong hapoh ka jingïalam jong ka bor synshar district ryngkat ka jingkyrshan na ki tnad bad ki jaka treikam bapher-bapher, kane ka Camp ka la wanrah lang ïa ki riew shemphang ha ka liang ka koit ka khiah na Gauhati Medical College and Hospital (GMCH), Fakhruddin Ali Ahmed Medical College and Hospital (FAAMCH), Barpeta, bad ka Ophis jong u Joint Director of Health Services, Barpe.
La ai ïa ki jingshakri kiba bun jait, kynthup ïa ki Test ban lap ïa ka jingpang, ka jingpeit bniah ïa ki jingpang bym lah ban saphriang, bad ki jingai jingmut ha ka koit ka khiah ba kyllum.
Na ki 3,206 ngut ki nongpang kiba la eksamin, 321 ngut la phah sha ka FAAMCH na ka bynta ka jingsumar kaba kham shalor ban pynlong ha u bnai ban wan.
Ka koit ka khiah jong ki khynnah ka la long ka mat ba kongsan, ha kaba la pynlong ïa ki jingpeit bniah na ka bynta sanphew tylli ki jingpang ba kongsan kiba ktah ïa ki khynnah naduh ba kha haduh 18 snem.
Ki jingpyrshang ban pynkhih da u Sarva Shiksha Abhiyan bad ka tnad Social Welfare ki la pynthikna ïa ka jingïashim bynta kaba khlaiñ na ki skul bad ki Anganwadi Centre.
Ha kane ka jingïalang la ïohi ruh ïa ka jingïatreilang ha kylleng ki bynta, ha kaba ka Assam Cancer Care Foundation ka la pynlong ïa ka jingpynsngewthuh paidbah bad ka jingpeit bniah kloi ïa ka jingpang Cancer, ka tnat Public Health Engineering ka la kyntiew ïa ka um kaba khuid bad ka jingkhuid jingsuba, bad ka Assam State AIDS Control Society ka la pynsngewthuh shaphang ka jingpang HIV/AIDS.
Ki tnad Pule Puthi bad ka imlang sahlang ki la don ka bynta kaba radbah ha kaba pynkhih ïa ki nongïoh jingmyntoi, da kaba thaw ïa ka jinglong jingman jong ka koit ka khiah kaba pura shisha.
Ha kane ka camp la wan ïashim bynta da ki heh ophisar, kynthup ïa u Mission Director jong ka National Health Mission, Assam, u District Commissioner jong ka Barpeta, bad kiwei-kiwei ki heh ophisar jong ka district, kaba pyni ïa ka jingkyrshan ba khlaiñ jong ka bor synshar na ka bynta kane ka jingthmu. Ki heh sorkar ki la pynbna ba sa saw tylli ki camp katkum ka LAC yn pynlong ha ka distrik Barpeta ha ki taïew ban wan, ban pynthikna ïa ka jingbteng bad ka jingsumar hadien.
Ki nongïoh jingmyntoi ki la pdiang sngewbha ïa kane ka jingthmu, ha kaba bun ki longïing nongkyndong ki la pynpaw ïa ka jingsngewsuk ban ïoh ïa ka jingsumar ba kyrpang ha ka thaiñ khlem ka jingkit kaba khia ban leit sha ki jaka ba jngai.
Ki riew shemphang ki la kdew ba ka Barpeta Mega Health Camp ka lah ban long kum ka nuksa na ka bynta ban pyni nuksa ha kylleng ka Assam, kaba pynpaw ïa ka jingdonkam jong ka jingsumar pang ban ïada bad ka jingïatreilang jong ki tnad bapher-bapher.
