Shillong, Nailur 22
Hadien ka jingïakhih jong ki nongñiah kali kamai hapoh ka shatri jong ka All Khasi Meghalaya Tourist Taxi Association (AKMTTA), kaba la pynlong dang ha kine ki khyndiat sngi ba la dep, halor ka jingbym sngap ka Sorkar Jylla ïa ka jingdawa jong ki, kaba la ïaid mynta la ar snem eiei, na ka liang ki nongshong shnong ka Sohra ki la mih shakhmat ban ai ka jingkyrshan Ïa ka AKMTTA.
Lah ban kdew ba ka jingpynlong ka AKMTTA ïa ka jingïakhih, la lah ban ïohsngew ïa kiba bun ki jingud jingnam na ka liang ki nong Sohra kiba la pynsngew ba ka jingleh ka AKMTTA ka la ktah bha ïa ka kamai kajih ha katei ka thaiñ Sohra hi baroh kawei.
Ha kine ki khyndiat sngi ba la dep, ki nongïalam ka Tour Operators Association of Meghalaya (TOAM), ki la pynlong ruh ïa ka jingïalang ha Mawkdok, ban ïamir jingmut halor kane ka mat ha kaba na kane ka jingïalang la lah ban ïohsngew ïa ka jingbitar jong kiba pynïaid ïing basa namar ka jingleh ka AKMTTA.
Kumta namar ka jingsngewkhia halor kane mat, na ka liang ki katto katne ngut ki nongshong shnong ka Sohra kiba dei ruh ki trai bad nongpynïaid jong ki ïing basa kiba don ha katei ka thaiñ, ki la mih shakhmat ban ai ka jingpynshai halor kane.
Kine ki nongshong shnong ki kynthup ïa u bah John W Thabah, u la ong “ngi kyrshan halor ka jingïakhih jong ka AKMTTA, ban nym shah ïa ki kali kamai na Assam ban rung sha ki jaka jngohkai pyrthei, hynrei dei ban kit hi da ki nongñiah kali kamai kiba na Nongbah Shillong ban ïalam ïa ki briew sha kylleng ki jaka jngohkai ha ka Jylla”.
U la ong ruh ba ka kam kit ïa ki nongwan jngohkai la shu bam jem beit da ki nongñiah kali kamai kiba na Assam.
Kumta ki la ong ba na ka liang ki nongshong shnong ka Sohra ki ai ka jingkyrshan ïa ka AKMTTA, da kaba kyntu ruh ïa ka Sorkar ban thaw ki lad ki lynti ban pynbeit ïa ki jingeh ba ki nongñiah taxi ki ïakynduh.
“Kane ka jingeh hi kadei naduh ki por ba mynshwa, ha kaba ki nongñiah kali kamai taxi jong ngi kiba leit ban kit ïa ki nongleit nongwan napoh kad liengsuiñ na Guwahati, kim ïoh wat tang ka jaka ba kin ïeng ruh. Kane ka long shisha ka jingktah kaba khraw ïa ki bad naduh kito ki por ka Sorkar kam shem la thaw lad thaw lynti ban ïakren bad ka Sorkar Assam ban ïa pynbeit da kano ka lynti kaba biang halor kane” la ong u Bah John Thabah.
Nalor kata, u la ong ba “Ngi sakhi ba ka jingwan buh ïa ki nongjngoh kai pyrthei hapoh ka thaiñ Sohra hi dei ki nong Assam bad lada kan long ha kane ka rukom ki Khasi trai ri trai muluk shano kin leit. Lada kane ka jingïakhih jong ki nongñiah kali kamai taxi kan jop, kan plie lad plie lynti ruh ïa ki paidbah ba kin kamai bad ha kajuh ka por ruh kan long ka jingaikam aijam’.
Kumta kane ka la dei ruh ba baroh ki Khasi kin mih ban ïa tylli, khnang ba kane ka jingdawa kan poi sha ka thong bad kan long kaba jop.
Haba bynrap pat na ka liang u Bah Batista Khongphai u la ong ba mynta ka la dei ka por ba baroh kiba im ha ka kam jngohkai pyrthei bad ha kino-kino ki bynta ruh ba kin bat ïa ka jinglong trai ha la ka jong ka ri.
Kumta ki la kyntu ïa ka Sorkar Jylla ba kan sngewbha ban shimkhia noh mardor halor kane ka mat jingdawa jong ki nongñiah tourist taxi khnang ba kan ym jia shuh kum kane ka jingjia nangne shakhmat.
