Shillong, Nailur 22
U Myntri ka tnad Pule-Puthi ka Jylla, u Bah Lahkmen Rymbui u la kyntait ban kren eiei halor ka jingkynnoh kyntur pud jong ka University of Science and Technology Meghalaya (USTM) sha ki jaka khlaw, da kaba kdew ba kane ka kam ka dang don hapdeng ka jingbishar ne ‘sub judice’.
Ka Central Empowered Committee (CEC) ba la thung da ka Supreme Court ka la ai jingmut ban daiñ kuna T.150 klur ïa ka USTM halor ka jingkynnoh ba ka la pynkylla ïa ki jaka khlaw khlem da ïoh ïa ki jingmynjur kiba donkam.
Ka kaiphod jong ka CEC ka pynpaw ba ka USTM ka la kyntur pud sha ki jaka khlaw kiba heh jan kumba 25 hektar ha Ri-Bhoi, da kaba pynkheiñ ïa ka Forest Conservation Act, 1980.
Ka komiti ka la kyntu ïa ka Supreme Court ban bthah ïa ka USTM ban pynneh biang ïa ki jaka ba shah ktah kumba long sha ka jinglong-jingman tynrai jong ki khlaw hapoh shisnem bad ban siew ïa ka kuna.
Haba kren sha ki lad pathai khubor ha ka Lah Sngi U Blei, u Bah Rymbui u la pynpaw ba ka Sorkar kam lah ban kren eiei halor kane ka kam tad haduh ba ka Supreme Court kan ai ïa ka rai jong ka.
“Kane ka dei ka mukotduma ha ka Supreme Court. Kumta tad haduh, bad katba ka Supreme Court kam pat ai ïa ka rai jong ka, ngam lah ban kren eiei halor kata,” u la ong.
Shuh-shuh u Myntri u la bynrap ba ka Sorkar kan ap shuwa ïa ka rai jong ka Supreme Court, da kaba pyrkhat ïa ki jingai jingmut jong ka CEC.
