Shillong, Nailur 22
Ki nonghikai Adhoc hapoh ka shatri jong ka Federation of All School Teachers of Meghalaya (FASTOM) ha ka 22 Tarik u Nailur 2025, ki la ïamih khrui ban ïaid paidbah ne ka rally da kaba jai-jai.
Kane ka jingïaid paidbah jong ki nonghikai adhoc kadei halor ka jingbym leh eiei ka Sorkar Jylla, haba ïadei bad ka jingdawa ban kyntiew ïa baroh ki skul adhoc sha ka Defisit System/Deficit Pattern.
La sakhi ruh ha kane ka sngi da ka jingwan tuid da ki hajar ngut ki nonghikai kiba kynthup na ki District bapher-bapher ha ryngkat bad rah ruh da ki plakad, ban pyni ïa ki mat jingdawa sha ka Sorkar.
Kane ka jingïaid paidbah, ki nonghikai ki la sdang naduh madan Malki ter-ter sha Lachumier bad pynkut biang pat ha madan Malki, ban pynlong syndon da ka jingïakhih shong kyllaiñ mungor.
Haba kren sha ki lad pathai khubor u Vice President ka FASTOM u Bah Sanborn Jungai u la ong, mynta baroh ki nonghikai kin shong kyllaiñ mungor ha madan Malki haduh ba ka Sorkar kan da sngap ïa ki jingdawa jong ki, kata ban kyntiew noh ïa ki skul Adhoc sha ka ‘deficit system’, ba kin ïoh jingsiew kum ki skul ‘deficit’.
Haba kylli halor ka jingbym ai ka Sorkar ïa ki jingdawa, u Bah Sanborn u la ong ka Sorkar ka aidaw ba ym don pisa hynrei lada ka don ka mon ka lah beit ban siew.
U la ong ba dei ban pynjah noh ïa ki skul adhoc bad kyntiew kyrdan noh ïa ki kum ki skul ‘deficit’ namar ba ki la shakri bad ïarap ïa ka Jylla ban kyntiew ha ka liang ka pule ka phuthi la da ki phew snem mynta.
“Ka sorkar ka lah ban siew tulop ïa ki nongtrei ki District Counci, kumta kam don jingeh ruh ban siew tulop ïa ngi lada ka don ka mon” la ong u Bah Sanborn.
U la ong ba kane ka jingïakhih da kaba shong kyllaiñ mungor ha madan Malki kan bteng beit bad sngi bad miet khlem da buh por haduh ba ka Sorkar kan ïohi bad sngap ïa ki jingdawa jong ki.
Kumta u Bah Sanborn u la dawa na ka Sorkar ba kadei ban shim noh ïa ka sienjam ban pynjah noh ïa ki skul adhoc bad ban kyntiew kyrdan noh ïa baroh ki nonghikai adhoc.
