Shillong, Nailur 22
Ka Meghalaya State Kickboxing Association ka la phah ïa 8 ngut ki nongïalehkai kickboxing bad uwei u coach sha ka Junior (Boys and Girls) National Kickboxing Championship 2025, kaba la sdang mynta ka lah sngi U Blei ha Solan, Himachal Pradesh.
Kane ka lympung kan kut ha ka 26 tarik mynta u bnai. La pynlong ïa kane ka lympung da ka Amateur Kickboxing Association jong ka Himachal Pradesh hapoh ka jingpeit jong ka WAKO India Kickboxing Federation.
Kane ka lympung kan long ka rynsan ïa ki nongïalehkai kickboxing ka Jylla kiba don ha ka kyrdan jong ka Ri bad ka Jylla ban ïai bat ïa ki kyrdan jong ki bad ruh ban shah jied na ka bynta ka World Championship, International Open Kickboxing Championship bad Asian Kickboxing Championship.
Kine ki nongïalehkai ka Jylla ki long u Erick Kharsati (K1 -81kg), Shongkun D Khongwar (K1 -65kg), Rishanskhem Lipon (Low Kick -54kg), Emiliana Susngi (Low Kick -45kg), Barkis Nongkhlaw (K1 -46kg), Derick D Nongrum (K1 -54kg), Aedriel Gordon Ranee (K1 -45kg) bad u Orickson Marbaniang (Low Kick -45kg).
Ha kawei pat ka liang ka MSKA ka la pynbna ba ka Daniella IW Mylliemngap bad ka Medariphylla L Nongbri ki la shah jied ban mihkhmat ïa ka ri India sha ka World Seniors and Masters Kickboxing Championship 2025 ka ban long ha Abu Dhabi, UAE, naduh 21 haduh 30 tarik u Naiwieng mynta u snem.
