United States, Nailur:
Ka Erika Kirk, kaba 36 snem ka rta, ka kurim jong u nongïalap bad u nongïakhun pyrshah ha ka imlang sahlang ïa ki katto-katne ki kam bym man, u Charlie Kirk, ka la ong ba ka map ïa u briew uba la shah kynnoh ba u pyniap ïa u kurim jong ka, haba ka la kren ia ka jingkren kaba jylliew bha lyngba ka jingngeit niam ha ka jingialang kynmaw burom ia u kurim jong ka, ha ka Sngi U Blei.
“U kurim jong nga u Charlie, u la kwah ban pynlait im ïa ki samla shynrang kumba long uta uba la shim ïa ka jingim jong u,” ka la ong ha ki paidbah kiba la ïadon palat 60,000 ngut, kynthup ïa u President jong ka America, U Donald Trump, ha kawei ka madan ïalehkai kaba la dap da ki briew ha ka jylla Arizona, kaba don shaphang shathie lam mihngi.
“Uta u briew, uta u samla. Nga la map ïa u,” la ong ka Kirk, ha ka sur kaba jem. “Nga map ïa u namar ka dei kaba U Khrist U la leh. Bad ka dei kaba u Charlie u leh,” ka la bteng. “Ka jubab kylliang ïa ka jingshun kam dei ka jingshun.”
U Charlie Kirk, 31 snem ka rta, u la shah siat bad shah pyniap ha ka 10 tarik Nailur, ha ka por ba don ka jingïakren paidbah ha kawei ka jaka pule jong ka skulbah ha Utah.
Une u nongïakhih u la pyndonkam da ki million ngut ki nongbud jong u ha ka social media, ka jingbun ki nongsngap ïa ka podcast jong u bad ki jingmih ha ki skulbah ban pynkhlaiñ ïa u Trump da ki nongthep vote kiba dang samla bad ban ïakhun na ka bynta ka jingmut jingpyrkhat jong ka saiñ hima sima kaba long kum ka jaitbynriew, kaba pynshong nongrim lyngba ka jingngeit Khristan bad pynïadei ia ka kam saiñ hima sima.
Ki bor pyniaid, ki ong ba utei u briew uba la shah kynnoh ba dei u nongsiat, la tip kum u Tyler Robinson, uba 22 snem ka rta, u la pynksan ïa katei ka jingleh jong u, da kaba pynpaw ka “jingshun” ïa u Kirk, da kaba kynnoh ba u Kirk, u la pynsaphriang bad ialap bakla, ong ki nongtohkit.
U Kirk u kyrshan ïa ki jinglong sain pyrthei Khristan kiba rim, bad bunsien u ju kren pyrshah ïa ki jaitbynriew rit paid, kynthup ïa ki briew kiba kylla shynrang ne kynthei, ki Muslim, ki nong African America bad kiwei-kiwei. U tei u nongshah mudui pyrshah u Robinson, u mad ïa ki hynriew tylli ki jingshah kynnoh, halor katei ka jingsiat ïap ïa u Charlie, kum ka kam pyniap briew kaba runar, bad ki nongmudui, ki la ong ba ki thmu ban pan ïa ka jing pynsajia da kaba jingpynshitom ba dei baun shah pynïap kat kum ka aiñ, haka mukot duma jong u hi.
