Nongpoh, Nailur 22
Uwei u samla u la ngat ha ka jingmynsaw jur hadien ba ka arshaka (scooty) kaba la ñiah ka la leit hap sha ka nala harud jong ka surok bah National Highway 6 ha Dulongnar, Ri Bhoi District, kaba la jia ha ka janmiet sngi Nyngkong, ha ka por kumba 3:25 eiei.
Katkum ka khubor ba la ïohlum, la ïathuh ba utei u samla uba la tip kyrteng kum u Mariawan Kynta, 27 snem ka rta ka Khliehshnong, Sohra u la wan hiar sha ka thaiñ Nongpoh da kawei ka scooty kaba don ïa u registration number ML05-T-4679 bad namar ka jingpynher sted palat, um lah shuh ban tehlakam ïa la kali bad leit thom beit-beit sha ka nala marjan bad Lay-bye Market ha Dulongnar.
Katkum ki dur khih, la sakhi ba katei ka jingtyngkhuh ka long kaba la shyrkhei kat haduh u steering u la dkut hi thui bad ka met jong katei ka scooty ka rung syndon sha khrum jong ka nala bad ïalade pat u la rynsied sha ka sem kali kaba don marjan bad ngat ha ka jingmynsaw kaba jur.
Na ka liang ki bor pulit, ki la pynkit noh ïa utei u samla sha Nongpoh Civil Hospital na ka bynta ban pynïoh ïa ka jingsumar bad la ïathuh ruh ba na ka liang ki doktor ba dei peit, kila pyntip ba hap ban pynkynriah noh sha kiwei ki jaka ai jingsumar kiba kham heh, namar ka jingjur jong ka jingmynsaw.
