Nongstoiñ, Nailur 22
Ha ka sngi Nyngkong jong ka taïew ki nongshong dukan hapoh ka ïew Nongstoiñ kiba hap ruh hapoh ka lama jong ka seng ki mahajon Ïew Nongstoiñ, ki la mih paidbah ban pynkhuid ïa ki kyndong kynshrot jong ka ïew da kaba sar, shut bad theh um ha ki bynta jong ki lynti ïaid kjat bad kiwei-kiwei ki bynta jong katei ka ïew.
Ha kane ka sngi, baroh ki dukan ki la khang shuwa shipor tad haduh ban da dep pynkhuid ha kaba naduh ki rangbah, ki longkmie bad kiwei-kiwei ki la ïa mih ryntih ban ïashimbynta ha kane ka sngi pynkhuid, bad hadien kane ka seng ka la ïoh ruh ban plie paidbah noh ïa ka ophis treikam jong ka, hapoh ïew Nongstoiñ ha kaba u Bah Baristar Syiem uba bat kum u Superintendent ka ophis u Syiem ka Hima Nongstoiñ u la long u kongsan.
Kumba long mynta la ïathuh ba hapoh ka ïew Nongstoiñ ki don haduh 637 tylli ki dukan bad ha katei ka sngi la ïadonlang ruh u Bah K. Mawlong, Second OC ka thanad Nongstoiñ uba la long kum u symbud kongsan, bad la synranlang da u Bah Mawkordor Kharsyiemlieh, President ka Village Defense Primary Committee Nongstoiñ Area (VDPCNA) bad kiwei-kiwei ki dkhot kiba kham hakhmat jong ka seng ki mahajon.
U Bah Baristar Syiem haba kren kum u kongsan u la ong, ka Hima ka la ai ïa ka bor ha ka seng ki mahajon Ïew Nongstoiñ ym tang ba kin ïa khaïi pateng hynrei ka Hima ka la pynkhamti ruh sha ka seng ba kan peitngor ïa ka shongsuk shongsaiñ, ka bha ka miat bad ban peit ruh ïa kino-kino ki kam sniew kiba mih hapoh ka ïew. Shuh-shuh u la ong ba haba peit ïa ka jinglong jingman jong ka ïew, kaba nyngkong la ïohi shisha ïa ka jingnang hiar jong ka ïoh ka kot hynrei haba phai pat sha kawei pat ka liang ka jingnang roi pynban jong ki kam sniew ka long kaba phylla ha kine ki sngi.
“Haba phai ba balei ki roi ki jingsniew, bunsien na ka liang ki nongshong shnong la ki dei na ka dong ka thaiñ ka jong ngi, la ki dei na kiwei-kiwei ki jaka ruh ka jingkynnoh ka long beit ïa ki bor kiba khmih bad peit ïa ka suk ka saiñ, ka jingkynnoh ka long ba ka synjor ka synshar ka khadar, ka aiñ ka kanun jong ki bor Sorkar hynrei haba ngi phai nyngkong ngi la synjor naduh ki ïing ki sem ki jong ngi namar ka bor kaba nyngkong eh ka dei ka ïing ka sem ki kmie ki kpa ki nongsynshar kiba nyngkong eh ban wanrah ïa ka lawei kaba bha bad ka phyrnai jong ki khun ki kti, ngi kham suk ban kynnoh ïa kiwei hynrei ngi klet ïalade,” ong u Bah Baristar.
