Jowai, Nailur 22
Ka Riatsaliya Mihmyntdu bad Pasyih Cultural SC ki la rung sha ka semi final ha ka lympung ïalehkai 3rd Division Football Tournament na ka bynta ka 5th Adelbert Laloo Memorial Trophy ba la pynïaid da ka West Jaiñtia District Sports Association (WJDSA) hadien ba ki la khur jingjop ha ka lah sngi U Blei.
Ha ka jingïalehkai quarter kaba nyngkong kaba la long ha Kiang Nangbah Stadium, Jowai, ka Riatsaliya Mihmyntdu ka la pynliem noh ïa ka Mookymphad Mihmyntdu da 2-0.
Kane ka nam jop ka la wan urlong lyngba ki kol ba la thep da u Meban Kharsotti ha ka minit kaba 25 bad u Ishanroi Pde ha ka minit kaba 74.
Ha ka jingïalehkai kaba bud, ka Pasyih Cultural SC ka la jop da 2-1 kol ïa ka Pateinki Sabahmuswang.
Ka Pasyih Cultural ka la ïoh ban thep ar kol ha ka kylla step lyngba u Seiborlang Dkhar ha ka minit kaba 23 bad kawei pat da u Ribait Dkhar (34), hynrei ka Pateinki Sabahmuswang ka la pynphai kylla shi kol ha ka kylla miet lyngba u Wanriki Lyngdoh (68) bad ka la mad ïa ka jingshah rem na ka daw ba kam shym la lah shuh ban pynphai.
Haba phai sha ka 2nd Division na ka bynta ka 8th Deno Shullai Memorial Trophy, ka Dongmihsngi ka la jop da 6-1 kol ïa ka Moosalyngkat SC.
Ïa ki kol ka Dongmihsmgi la thep da u Ewanmida oo Langstang ha ka minit kaba 11, kumjuh u Evening Tariang u la thep ar kol ha ka minit kaba 28 & 60, u Lalrin kima Nampui (54), bad u Romeo Lyngdoh u la thep ar kol ha ka minit kaba 58 & 71. Katba ïa ka shi kol jong ka Moosalyngkat la thep da u Rihokmiki Chyrmang ha ka minit kaba 46.
