Shillong, Nailur 22
Ka Umphrup ka la lah ban pynliem noh ïa ka Umphyrnai da 2-1 kol na ka bynta ban pynskhem bad ban ïaineh ïalade ha ka kyrdan ïalehkai Second Division jong ka Shillong Sports Association ha ka lah sngi U Blei ha SSA Stadium kaba ha First Ground, Polo.
Watla ka Umphyrnai ka la ïoh ban pynkhih jar nyngkong eh lyngba u Shemjingmut Kharmyndai ha ka minit kaba 14, hynrei hadien shiteng kynta ka Umphrup ka la lah ban pynphai kylla ar kol lyngba u Winjester Nongbri (37) bad u Damanglang Kharbangar (65).
Ka jingshah pynhap na ka Second Division mynta u snem ka la long kaba kham pher, ha kaba ki lai tylli ki kynhun kiba don shatrai ki ïoh ban ïakhun pyrshah. Te kumta ki ar tylli ki kynhun kiba wan kham shatrai ki shah pynhiar noh sha ka Third Division.
Na kine ki jingïakhun ka Umpling ka la shah rem ha ka Umphyrnai da 2-1 kol bad ha ka Umphrup da 4-2 kol hashwa ban pynthikna ïa ka jinghiar kyrdan. Kumjuh ka Umphyrnai kaba la shah rem hynne ka sngi ka la hap ban synran lang ïa ka Umpling ban ïahiar sha ka Third Division.
